E dianan 15 y 16 di december proximo, Aruba Wielerbond lo tin su ultimo actividad riba e calendario pa e aña 2018 unda lo organisa dos dia di competencia den e disciplina di Mountain Bike esaki den e becindario di Calabas.
Mester bisa cu lo por competi den e categorianan di Kids(Boys&Girls) 1,2,3 y 4, den masculino elite, master(a,b y c), junior y pre-junior, femenino elite, master, junior y pre-junior. Riba diasabra 15 di december e competencia lo ta pa e mas chikitonan esta Kids y lo inicia pa 7.30 di mainta. Pa su mañan diadomingo 16 di december esaki lo ta pa e adultonan mientras e competencia lo inicia tambe pa 7.30 di mainta. Ta bon pa menciona cu e deporte di mountain bike ta hopi popular unda mas y mas hende a cuminsa practica deporte na nivel competitivo. Algun dia atras nos por a mira un interes grandi pa e Duo Xtreme y no tin duda cu e campeonato nacional di MTB lo adkeri hopi participante.
Stichting Sportsubsidie Aruba ta contento di por aporta y brinda e ayudo necesario na e federacion di ciclismo pa nan campeonato nacional di mountain bike 2018.
Lotto, e loteria di Aruba ta ofrece diferente weganan manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana.
Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
