“E yegada di e barconan Irani aki lo altera e ordo regional,” Rocio San Miguel, presidente di e Control Ciudadano, un organisacion no gubernamental cu ta monitorea e forsanan arma di Venezuela, a bisa den un articulo di Miami Herald.
Segun analistanan e declaracion cu Iran por desplega barconan di guera di un generacion nobo den laman Venezolano, ta e mama di tur provocacion, ya cu e por altera e ekilibrio geopolitico di e region y cu tur siguridad altera Gobierno di Merca.
“Esaki lo bay molestia tur 14 pais cu tin frontera cu Venezuela y lo genera un situacion indeseabel,” el a agrega den un entrevista telefonico desde Spaña.
Memey di e tensionnan creciente entre Washington y Teheran, e Gobierno Irani a lansa siman pasa un destructor, construi den e pais Islamico, cu propiedadnan scondi cu ta permiti evita e deteccion di radar.
Den un di su prome comentarionan oficial riba e destructor nobo Sahand, cu por transporta helicopter, tira torpedo y deriva avion, Iran a bisa cu e por desplega dos pa tres di nan pa Venezuela.
“Nos plannan den futuro cercano ta inclui manda dos pa tres barco, cu helicopternan special na Venezuela, den un mision Suramericano cu por dura cinco luna,” e comandante adhunto di marina Irani, Touraj Hassani Moqaddam, a bisa den un articulo di Reuters.
Venezuela a converti den un aliado strategico importante di Iran durante e ultimo 20 añanan di e gobierno Chavista y e dos paisnan a firma acuerdonan economico y militar cu bal miles di miyones di dollar Mericano.
San Miguel a bisa cu apesar di e acuerdonan, ningun di e proyectonan conhunto tabatin exito. Pero si e anuncio di Teheran resulta corecto, esey por resulta hopi negativo pa ambos pais, Martin Rodil, un experto den relacionnan Iran-Venezuela a adverti.
“Esaki ta extremadamente peligroso. Ta un locura manda tres barco di guera den e cura patras di Merca,” Rodil a bisa for di Washington DC. “Si e sosode, lo unico cu Washington lo haci ta manda un portaavion na e costa Venezolano.”
“Iran ta awe den e punto mas critico di e politica exterior di Merca. E ta un di e temanan caminda Presidente Donald Trump a pasa mas tempo y a mandamento di e barconan aki lo ta un provocacion cu e gobierno no por a ignora,” el a agrega.
Trump a saca Merca di un acuerdo internacional firma pa e gobierno di Obama pa contene e programa nuclear di Iran y a reintroduci sancionnan comercial pa Teheran. Trump a argumenta cu e acuerdo tin erornan grave pasobra e no a wanta e desaroyo di misilnan balistico na Iran.
Apesar di e advertencianan di Washington cu Iran ta sigui ta un peliger pa e mundo occidental, e regimen di Nicolas Maduro na Caracas a sigui mantene relacionnan caluroso cu Teheran. E relacion aki, ademas di e relacionnan di Teheran cu Havana, Moscu y mas recientemente, Istanbul, a bin ta generando temor na Venezuela, specialmente debi na e tension creciente entre e paisnan aki cu Merca.
E oposicion Grand National Alliance a alega cu Maduro ta dispuesto na crea un crisis internacional si ta necesario pa fortalece su relacion cu e paisnan aki na un momento cu e resto di e comunidad internacional a bin ta denuncia su regimen pa violacionnan di derechonan humano, rara bes mira na nivelnan di corupcion y destruccion di e democracia Venezolano.
“E accionnan aki, cu ta parti di un script skirbi na Cuba, a wordo diseña pa crea un conflicto internacional cu e obhetivo di mantene Maduro na poder despues di dia 10 di Januari, ora cu ta supone cu su mandato presidencial lo expira, a cambio di entrega e control di “Nos teritorio nacional na Rusia, China, Cuba, Iran y otro paisnan,” e Aliansa a bisa den un comunicado.
“Maduro sa cu e ta hinca entre cashi cu muraya. Gobierno di Merca y e Presidente di Brasil, Jair Bolsonaro, a bisa claramente cu nan lo actua pa reestablece democracia na Venezuela,” el a agrega.
“E minister di relacionnan exterior di Chile a anuncia publicamente cu varios nacion lo caba cu nan reconocimento di e regimen Venezolano entrante dia 10 di Januari,” el a agrega. “Cada biaha ta aparece mas prueba den exterior riba e corupcion grave entre e lider y aliadonan di e revolucion (Chavista) y Maduro a sufri un derota humiyante durante su mas reciente bishita na Mexico.
