Diadomingo mainta a habri cu personal di ELMAR den accion, pa drecha locual a tuma luga marduga cu pal’i luz. Chauffeur bou influencia a pasa ranca esaki.
E accidente aki a tuma luga den careda di 3:00 am (marduga) riba Avenida Milio Croes, Dakota. Un persona na stuur di un Nissan Cube blanco, completamente intoxica, a bin tur cu tin y pasa ranca e palo causando basta destruccion.
Na yegada di polis a tuma nota den e estado cu e tabata aden y a deten’e na sitio. Pa locual ta e situacion cu e palo di luz y e area afecta, mester a cera caminda diadomingo mainta pa asina por a traha pa repara e daño causa.