Parlamentario di MAS, Aquannette Gunn, den un carta manda pa presidente di Parlamento, mr. Edgard Vrolijk, a mustra riba e echo cu director di ATA, den un reunion cu Comision di Turismo a indica cu nan a haci un investigacion relaciona cu e plantanan di purificacion di awa, RWZI. Y cu dia 26 di januari ultimo a brinda e rapport aki tanto n’e Minister di Transporte, Integridad, Naturalesa y Asuntonan di Adulto Mayor, Ursell Arends como tambe n’e Minister di Turismo y Salud Publico, Dangui Oduber.
E parlamentario a sigui bisa cu mirando e echo cu dia 21 di februari el a haci un peticion y tambe a manda un recordatorio riba 14 di maart n’e Minister di Turismo, ta lamenta cu e minister en cuestion no a duna e atencion debido te cu dia di awe.
Esaki ta e motibo tambe pa cual Parlamentario Gunn a dicidi di dirigi e mesun peticion aki na Minister di Transporte, Integridad, Naturalesa y Asunto di Adultonan Mayor, Ursell Arends. Si tene na cuenta cu e minister en cuestion ta maneha e cartera di integridad, e parlamentario ta di opinion cu e mandatario no por tin obhecion pa comparti e rapport aki cu Parlamento.
Di e manera aki tambe Parlamento lo tin un miho bista di kico ta pasando cu e dos plantanan di purificacion di awa.
