Pa recorda con Hesus a muri pa nos na cruz, den Santa Cruz a tene Caminda di Cruz. A mustra con Hesus a carga su cruz y con e soldaatnan Romano tabata maltrat’e. Tin di corda cu Hudas a bende Hesus pa 30 moneda di plata, unda e soldaatnan a deten’e, a maltrat’e y a pone carga un cruz te ora yega e sero di Golgotha pa crucific’e.
Un grupo a haci e dramatisacion con a crucifica Hesus. Den e cayanan di Santa Cruz a mustra kico tur Hesus a pasa aden te na ora di su morto, e momento cu e soldaatnan Romano a crucific’e. Tambe nan a mustra con su mama a compañ’e te na final. Nan meta cu esaki ta pa trece e reflexion, pa recorda e motibo cu el a muri pa nos.
Durante e Caminata di Cruz bibo, a lesa cada stashi, cada momento cu a pasa durante e dia cu a crucifica Hesus. E caminata a termina dilanti di misa di Santa Cruz Inmaculada Concepcion, unda a crucific’e y despues el a resucita.
Pastoor Jairo Maduro a indica cu tabata sublime di por a participa n’e dramatisacion di e Pasion di Señor. Ta un momento profundamente spiritual y a medita e diescuater stashinan, unda a yega te na cas di Señor.
Pastoor Jairo a indica cu ta di suma balor pa medita tur loke Señor a haci pa nos. “Nos sinti, nos bista, nos horea, inteligencia ta laga nos compronde y ta hiba nos na tanto tempo pasa cu un hende a dal un stap padilanti pa entrega su bida pa nos”, el a expresa. Tur esey ta trece beneficio. Henter e acontecimento, e manifestacion popular, carga cu devocion ta keda cu su sentido fuerte ora ta bay participa den otro celebracion di su resureccion.
Diasabra anochi den tur parokia ta cuminsa e Vigila Pascual pa por completa e meditacion haci durante dia. Ta sumamente participante pa participa n’e celebracionnan di iglesia. Tin di celebra Cristo resucita.
Hesus ta bibo memey di nos, tabata palabra di e pastoor.
Gina Nuboer, organisado, a gradici un y tur cu a presenta n’e caminata bibo y mustra nan sosten pa cana den e cayanan di Santa Cruz, a cana e Caminda di Cruz Bibo, cu ta casi real.
