Minister di Salubridad Publico y Deporte, Dangui Oduber, a participa awe nochi durante e conferencia di prensa di Gobierno, cu tur preparacion ta cla pa reapertura di frontera cu Merca diabierna awo dia 10 di juli.
Manera ya a informa, un strategia di proceduranan cu extra medida di control ta na vigor pa e estadonan cu mas riesgo di Merca pa reduci e riesgonan pa Aruba mas tanto posibel. Desde cu a habri frontera pa Europa, Canada y parti di Caribe, tur departamento y instancianan concerni ta trahando duro cu hopi dedicacion na nos Aeropuerto.
Diabierna lo yega 700 pasahero for di Merca, diasabra 1400 pasahero y diadomingo 700. Antes Aruba ta ricibi alrededor di 20 mil turista Mericano pa siman, sinembargo e biaha aki lo ta apenas 2800 turista lo yega durante e prome siman. Aruba a scoge conscientemente pa siguridad y no cantidad, pa asina gradualmente cu un bon maneho, por logra controla e riesgonan pa nos pais y su poblacion.
Taskforcenan di Gobierno tambe ta cla pa asumi nan tarea di controla negoshinan y tur otro instancia cu tin cu cumpli cu protocol.
E situacion na Hospital ta resolvi, e capacidad di Intensive Care entrante diadomingo awor lo normalisa atrobe, igual cu e capacidad prome cu e candela di dia 16 di juni ultimo.
A haci testnan na Hospital pa controla e calidad di aire y tur a sali bon. E mudamento di e ekipo lo tuma luga den siman y weekend y pa diadomingo tur cos lo ta cla.
“Mi ta gradici tur e trahadonan di e departamentonan tanto di Hospital, Gobierno como di e contratistanan y tur otro instancianan tecnico cu ta yudando nos. Aruba ta para dilanti retonan hopi grandi, sinembargo cu cooperacion di tur hende hunto nos lo logra habri nos fronteranan, maneha e virus na bon manera y recupera nos economia y futuro”, asina Minister Dangui Oduber a clausura e conferencia di prensa.
