Durante e ultimo simanan a bin ta analisa e reaccion di turistanan fiel cu ta bishita nos isla. A base di mayoria di e comentarionan di e turistanan por conclui cu un parti grandi no lo biaha pa Aruba debi na e Aruba Covid Insurance. Den un grafico unda cu nos a compila diferente opinion riba diferente social media groups di Aruba, nos lectornan por lesa e comentarionan pa nan mes.
Tambe awe durante e cumbre entre gremionan y Gobierno di Aruba por a tende cu AHATA su proyeccion actual pa luna di Juli ta un nivel di ocupacion di solamente 9% vs e 20% cu inicialmente a keda calcula.
Un gran parti di nos turistanan fiel ta opta pa cancela nan biahe pa Aruba y ta opta pa bay un otro destinacion. Tin otro ta opta pa no biaha mes. Mayoria comentario ta basa nan mes riba sea e hecho cu nan tin seguro caba of riba e prijs di e seguro obligatorio y den hopi caso adicional cu nan tin cu tuma.
Hopi ta papia cu e ta bira un peso mucho grandi riba famianan grandi y of famianan cu ta keda largo ariba e isla. Esaki defintivamente lo haci cu e ‘start up’ di nos economia por medio di turismo lo bay hopi pocopoco. Otro gasto cu tambe ta suma na e gastonan adicional ta e gasto di e PCR test pa cada miembro di famia.
Por a tuma nota cu tin algun destinacion cu no ta cobra e turista pa e test. Tumando tur e gastonan extra na cuenta, nan ta opta pa biaha kisas na 2021 den espera cu e medidanan aki ta mas pagabel of cu nan no tey mas. Por nota tambe cu den e gruponan di social media di Europa varios persona di e.o Hulanda cu tambe ta comenta cu nan tin gana di bin Aruba pero cu e ta bira impagabel.
Gobierno di Aruba a duna di conoce cu aki dos luna lo evalua e programa di Aruba Covid Insurance y lo evalua si lo sigui cu ne y of si e lo keda na e mesun prijs.
