Den un entrevista breve awe tardi cu parlamentario pa fraccion MEP, Alvin Molina, el a conta con den e ultimo tempo, tabatin bon oportunidad pa inverti den negoshi pa prepara pa un economia despues di COVID, pero no tin suficiente tumando luga pa esaki.
Segun Molina, for di tempo di campaña y despues cu a firma acuerdo di gobernacion a palabra cu lo bay inverti den San Nicolas p’asina amplia e servicionan pa nos turistanan y pa busca otro manera pa nos economia crece.
Minister di turismo a hasta saca un comunicado bisando cu turismo a conoce crecemento, pero San Nicolas “falta hopi ainda pa desaroya pa e turismo por sigui crece anto bo ta mira esey duidelijk…no tin suficiente negoshi pariba di brug pa por duna e servicio na e cantidad di turista spera pariba.” Esaki segun Molina ta netamente locual ta pone e turistanan keda den hotel en bes di inverti nan placa den negoshi local pafo di hotel.
Segun el a sigui splica, tin un cantidad di inversionista cla pa inverti nan placa den negoshi local pafo di hotel, tin idea, tin plan cla pa yuda desaroya e districto pa tanto e localnan como e turistanan gosa di esaki.
No obstante di tur esaki, tur e plannan aki tin en comun ta cu mester di tereno pa ehecuta e plan y aki ta caminda e proceso ta tranca, segun Molina. Asina el a sigui bisa cu hopi biaha e inversionistanan ta cansa di warda y ta responsabilisa e departamento di DIP cu no ta funcionando manera mester ta y “no ta dunando Aruba ainda e servicio cu e tin mester.”
Esaki t’e caso cu Kamini Kurvink, Propetario di kaminis kitchen, ta pasando aden tambe. Segun el a splica, e tin algun tempo caba cu e tin plan riba mesa pa expande e servicionan di su negoshi y kier cuminsa cu desayuno, pa cua e mester mas espacio. “Mi tin vision pa San Nicolas y mi no ta laga niun hende desvia mi vision.” Sinembargo, e plannan aki ta tranca pa motibo cu e departamento di DIP tin varios aña ta bisa cu “nan ta bezig cu ne.”
