Dia Mundial di concientisacion riba Abuso di Anciano ta ser recorda cada aña dia 15 de juni. E dia aki a ser reconoci oficialmente pa e Asamblea General di Nacionan Uni den su resolucion 66/127, di december 2011, a peticion di e Red Internacional pa Prevencion di Maltrato di e Adulto Mayor (International Network for the Prevention of Elder Abuse (INPEA), cu a establece pa prome biaha e conmemoracion na juni 2006. E dia aki ta representa e fecha unda mundo henter ta expresa su oposicion na abuso y sufrimento infligi na esunnan di nos generacionan di e adulto mayor. Adulto mayor ta permanece invisibel y desprotegi y barera structural neglisha.
Marco internacional di e derechonan humano existente ta carece di un instrumento legal integral cu ta defini standard normativo pa proteccion di e adultonan mayor contra abandono, abuso y violencia. Abuso di anciano ta un problema universal y ta prevalece tur caminda y por sosode cualkier luga, pa cualkier persona , pero cu mas frecuencia den seno familiar, institucional y social.
Abuso di anciano, e abuso di adulto mayor (incluso esunnan cu problemanan cognitivo) ta defini como “un acto unico of repetidamente, of pa falta di un accion adecua, (negligencia) cu ta tuma luga den cuakier relacion cu por spera confiansa y cu ta causa daño of angustia na un adulto mayor”. Esaki ta un problema social global cu ta afecta salud y e derechonan humano di myones de adulto mayor den mundo henter y un problema cu merece atencion di comunidad internacional, incluso Aruba.
Na hopi parti di mundo e abuso di anciano ta tuma luga cu poco reconocimento y como sifuera ta algo normal of un norma acepta. No ta hopi tempo cu e problema social grave aki tabata skondi pa bista di publico y considera principalmente un asunto priva. Incluso awendia abuso di anciano ta sigi ta un tabu, mayoria biaha subestima y ignora pa comunidad den mundo henter. Sin embargo, tin evidencia substantial cu ta indica cu e abuso di anciano ta un problema importante tanto social y di salud publico.
Abuso di anciano ta un problema cu ta existi tanto den e paisnan den desaroyo como den esunnan desaroya, pero por lo general no ta wordo denuncia na nivel mundial. E tasa of estimacionan di prevalencia ta existi solamente den paisnan desaroya unda ta papia di un prevalencia di 1% te 10%. Aunque e maltrato/ abuso di anciano ta desconoci su importancia social y moral ta evidente tambe na Aruba. Como tal, mester exihi un reacion global riba tur nivel y cu ta enfoka, riba proteccion di e derechonan y seguridad di e adulto mayor ( incluso tur pensionado).
Na Aruba tin casi nada di infrastructura cu ta promove inclusión y seguridad di e población anciano.Ta existi diferente documento prometedor, pero den práctica, Aruba ainda ta carece di política efectivo pa preveni abuso y pobreza di anciano riba tur nivel. Esaki tambe ta ensera derechonan di nos grandinan pa ser trata cu respet y dignidad. Ohala un día Aruba por gosa di un ley di proteccion di nos grandinan.
Desde un perspectiva social y di salud, y den nomber di e proyectonan:“Comunidad Amigable y Sigur pa nos grandinan” y proyecto “BISA NO NA ABUSO DI ANCIANO (desde 2011) Fundacion Alzheimer Aruba (FAA), kier enfatisa cu maske e atencion primaria di salud di atencion medico como esun den e sectornan y servicionan social ta bon equipa pa identifica y trata e problema di maltrato di adulto mayor; e abusonan aki ta continua siendo subdiagnostica y neglisha, especialmente a traves di e asina yama “generation gap”. E sensibilisacion y prevencion di maltrato/abuso di anciano ta rekeri participacion di henter comunidad. Abuso y maltrato di adultonan mayor solamente por evita cu exito, si nos desaroya un cultura global (tambe comunitario) cu ta fomenta solidaridad intergeneracional.
