Durante e encuentro gubernamental di reino, unda cu Aruba, hunto cu su partnernan den reino, Corsou y Sint Maarten a reuni cu Secretario di Estado Alexandra van Huffelen na Sint Maarten, prensa a haci pregunta riba diferente topico.
Entre otro riba e situacion di e adultonan mayor cu ta biba riba un plan di pensioen minimo.
Aruba a pasa varios medida financiero, imponi pa Hulanda. Nos comunidad ta mira aumento di prijs tur caminda. Con Hulanda por yuda e gobierno di Aruba duna e adultonan mayor un alivio financiero ta un pregunta cu nos medio, 24ora.com a haci n’e Secretario di Estado.
El a comenta cu e meta tras di e acuerdo cu a haci diahuebs y diabierna, ta pa mehora bida di tur cu ta biba riba den Caribe Hulandes.
Debi cu ta papiando aki di resiliencia y sostenibilidad riba nos islanan, pa percura cu e economianan ta crece, ta traha pa mehora salubridad, enseñansa y tur e topiconan aki. E idea ta pa traha hunto, van Huffelen a menciona.
E consecuencia financiero directo y e responsabilidad ta di e islanan, pero loke ta bay p’e ta pa traha hunto pa mehora bida di tur hende. Esaki ta un meta cu Van Huffelen ta comprometi cu ne, pasobra realmente ta pensa cu hunto por ta mas fuerte riba e aspectonan aki.
Prome Minister Evelyn Wever-Croes a agrega cu specialmente p’e adultonan mayor tabatin un enfoke special.
Dia prome di januari ultimo a introduci algun medida cu ta alivia e carga cu nan a experencia. A reduci belasting p’e pensionadonan y tambe pa tur hende cu ta gana un pensioen cu 2%. Pareha casa cu ta haya pensioen, a baha e belasting tambe. A aumenta nan reparatietoeslag p’e pensionadonan y tambe e pensioen a aumenta.
Gobierno ta consciente cu e costo di bida ta creciendo na Aruba. E ta un area di preocupacion pa gobierno, pero ta trahando riba dje, e prome mandatario a indica.
