Tur hende muher mester wordo balora, muher ta nos mama, Dios a usa un muher pa trece nos Salbador na mundo.
Dios a mira cu no ta bon pa e homber ta su so, Dios a traha e muher for di e homber pa asina e muher por ta hunto cu e homber pa yude den tur su responsabilidad nan.
Esaki no ta nifica cu e homber mester tira tur responsabilidad riba e muher, ni maske e muher tin bon salario, e homber ta keda cabes di cas, pasobra esey ta un posicion cu Dios ta duna un homber den matrimonio y den su famia.
E hende muher a wordo traha di un forma maraviyoso, e tin mas organo cu un homber, pasobra riba e mundo aki ta solamente muher por sali na estado, muher por carga baby 9 luna, y trece e baby na mundo, cu ayudo di Dios.
Ta solamente un muher tin un matris den cual un yiu por wordo forma, y su curpa ta habri milagrosamente pa e baby nace y solamento un muher tin pecho cu un baby por bebe lechi for di dje.
Pesey pa imita un muher, fisicamente y mentalmente ta hopi dificil, y mas dificil ta tuma e posicion di muher den comunidad.
Pero nos mester tene cuenta con riba henter mundo , hende muhe ta wordo maltrata, hende muher ta wordo mata, hende muher ta wordo bendi, tur esey ta desmostra na nos cu e plan di diabel contra hende muher no a termina.
Laga nos no lubida e prome encuentro cu tabatin entre e muhe y diabel den paraiso, caminda tur cos a sali for di man, pero despues Dios den su misericordia a duna e muher e chens di trece nos Salbador na mundo.
Poniendo asina hende muher na un lugar prestigioso riba mundo henter, un posicion di respet y honor.
Ora un homber laga diabel gañe y kier haci manera ta muher e ta, e ta kibra su relacion cu Dios, pasobra e ta bay contra creacion y drenta un posicion di orguyo y rebeldia, cual ta abominabel den bista di Dios.
Bienaventura ta e muher fiel na su esposo, su cas y su familia, bendiciona ta e muher cu ta alaba Dios tur momento y asina Dios su presencia ta move riba su bida.
E muher mester somete su mes na su esposo, esey ta nifica duna tur cooperacion necesario, pa e bon funcion di matrimonio y famia.
Asina anto , laga cada un di boso, tambe stima su esposa manera su mes,y e esposa percura, pa e respeta su esposo. ( Efesionan 5;33).
Ta para scirbi den e buki di Daniel Capitulo 11:37 cu lo tin un rey cu ta halsa su mes y cu no ta haci caso na deseo di muhernan.
.
Nos ta drentando un tempo peligroso, caminda doctrina di diablo ta sali na cla, pa asina siña hende muher pa no tene relacion cu homber, pa asina desvia nan completo for di e proposito cu Dios a traha nan.
Y si nos wak bon nan kier cuminsa cu e doctrina aki for di scol, for di ora e mucha ta chikito , pa e crece cu e mente corumpi, daña y asina evita di tur forma cu e parti di e multiplicacion di hende, no sigi su curso maner e palabra di Dios ta bisa.
Pesey awor ta e tempo cu mas cu nunca nos mester cuida e ser cu ta hende muher, y evita di tur forma pa e no cay den trampa di e enemigo.
Sinceramente, Pastor Marcel Balootje.
