No ta di awo, pero for di un tempo caba ta conoci cu e sector HORECA (Hotel, Restaurant & Cafe) ta den necesidad grandi pa logra recluta talento culinario na Aruba. Tin un scarsedad grandi di coki, pa cual e asociacion di turismo a dicidi di busca manera pa yuda cu e “labor shortage” y e gap entre mercado laboral y e sector di educacion, specialmente den e area culinario.
Cu e realidad aki riba mesa, e restaurantnan y e hotelnan constantemente mester recluta coki y personal di cushina for di exterior, cu tur e gastonan extra y dificultad cu esey ta trece cu ne. P’esey Aruba Hotel & Tourism Assocation ta haciendo hopi esfuerso pa purba haya mas hoben drenta y caba enseñansa culinario y pa e sistema educacional ta “fit” e demanda actual di e restaurantnan y e hotelnan.
AHATA tin comunicacion y colaboracion continuo cu e scolnan cu ta yuda prepara, educa y inspira e talentonan cu mester den restaurant, pa analisa unda por yuda y apoya, incluyendo Educacion Profesional Basico (EPB), Educacion Profesional Intermedio (EPI) y Enseñansa pa Empleo (EPE).
Un bon ehempel di e compromiso y dedicacion di AHATA na e sector specifico aki ta door di haci donacion di ekipo na EPB San Nicolas y donacion di cuchiu di chef na e studiantenan culinario na Colegio EPI y donacion di ekipo di servicio na EPE.
Pa yuda identifica pakico hopi studiante culinario no ta busca trabou den cushina y den restaurant despues di scol y pa mira con sector priva por sostene e scolnan pa eleva nan resultado, Tisa LaSorte, CEO di AHATA, a dicidi di organisa un reunion pa trece e partidonan hunto.
Director di e scolnan tabata di acuerdo cu ta un bon idea pa cuminsa un combersacion entre e chef ehecutivo cu ta dunado di trabao y e docentenan culinario di Colegio EPI y di EPB. Tur docente culinario di Colegio EPI y EPB a atende e reunion y chef ehecutivo di Aruba Marriott Resort, Aruba Holiday Inn Resort y Divi Resorts a participa den e dialogo.
A elabora riba con por facilita e stroming for di EPB pa EPI. Tambe a dialoga riba con sector priva y e chefnan profesional por yuda e scolnan y kico e chefnan ehecutivo ta haya falta den e candidatonan hoben cu ta buscando trabou. E chefnan a splica e docentenan presente kico ta bunita y kico ta duro di e trabou di un chef. Den esey a toca e tema tambe di e retonan cu studiante tin pa caba scol, segun observacion di e docentenan. A bin dilanti e necesidad p’e hobennan compronde e trabou y dedicacion cu mester di dje pa crece den nan carera den cushina.
E participacion durante e reunion tabata uno productivo, pasiona y sigur hopi positivo. A acorda cu lo sigui traha riba algun sugerencia cu a sali for di e reunion y lo continua cu mas dialogo y colaboracion.
AHATA ta impresiona cu e docentenan, directiva di cada facultad y e chefnan ehecutivo pa nan cariño y atencion pa e studiantenan y e tema actual di con promove mas carera culinario den sector HORECA di nos pais.
