Aeropuerto ta informa di cambio cu tin den vuelo di aerolineanan Latino pa Aruba. Ya caba Gobierno di Aruba a anuncia cierre di e frontera cu Brasil desde Januari 25 ultimo dor cu Brasil ta un area di halto riesgo di Covid-19 actualmente.
Como resultado, aerolineanan operando pa Aruba for di otro paisnan den Latino America a wordo afecta y a cuminsa wak demanda disminui.AUA Airport kier aclarea y informa cu sinembargo e servicio aereo ta keda existi desde Colombia y Panama.
Cierto aerolineanan desde e region di Latino America a dicidi pa temporalmente suspende cierto frecuencianan den e lunanan di Februari y Maart 2021. COPA, actualmente operando for di Panama City, Panama lo opera 1 buelo menos pa siman desde Februari 2021. Buelonan e ora ey lo ta riba Dialuna y Diasabra. Avianca, operando for di Bogota, Colombia lo sigui opera 3 buelo pa siman durante Februari 2021 riba Diaranson, Diabierna y Diasabra.
Den Maart 2021, Avianca lo baha nan frecuencia y lo opera riba Diabierna y Diasabra. Wingo, tambe operando for di Bogota, Colombia, a confirma nan compromiso awe cu nan kier sigui opera 2 biaha pa siman pa ful aña 2021.
Seramento di e frontera cu Brasil, manera a wordo anticipa, a influencia e frecuencianan di e aerolineanan di Latino America como cu e buelonan aki ta transporta pasahero tambe for di e mercado Brasileño pa Aruba via nan puertonan di embarque den Colombia y Panama.
Aruba Tourism Authority lo sigui monitorea esaki di cerca y lo activa unda cu ta posibel, esfuersonan pa fortalece e mercado di Latino America. Aruba su frontera ta habri pa tur mercado excepto for di Brasil, Venezuela y Peru na e momento aki.
