“Mi mes no a haya ningun carta y no ta na altura di ningun keho riba mi maneho”, asina ing. Haime Croes, director di Departamento di maneho di Infrastructura y Planificacion (DIP), a sigura awe mainta. El a keda sorprendi ora Minister Presidente a mand’e un carta di e trahadonan, kehando riba su maneho interno den e departamento encarga cu otorgamento di tereno.
DIP ta consisti di 55 empleado, cu diariamente ta procesa un cantidad di peticion pa tereno, tanto individual como comercial. Ta un departamento cu ta rekeri un nivel di integridad halto, den cual trahadonan ta haci nan trabou sin ningun sorto di influencia aheno.
Haime Croes ta na cabes di DIP desde dia 1 di januari 2019. For di momento cu el a asumi e funcion, mesora a haci tur lo posibel pa baha e tempo cu ta warda pa tereno, aumenta eficiencia y garantisa un servicio husto y di integridad halto bou di e coleganan. Den e proceso, tur hende por a nota un cambio di 180 grado den maneho di tereno, den cual regularmente ta emiti cantidad di terenonan individual pa pueblo por construi man mesun cas.
Tambe a señala cu durante e proceso pa structura e servicio cu enfoke riba integridad, a start investigacion contra varios empleado. Un grupo di nan ta na cas, pendiente e investigacion riba posibel iregularidad pa cu e forma con nan ta procesa terenonan.
Departamento di maneho di Infrastructura y Planificacion ta atende no menos di 16 tipo di peticion pa tereno. E mas conoci den pueblo ta tereno di residencia y comercial. Pa tereno residencial ta pasa mas of menos 200 akte na notario pa aña. Pa tereno comercial ta pasa 25 akte pa aña. Henter e portfolio di productonan na DIP ta encera mas of menos 400 akte na notario pa aña.
Terenonan oficial ta esunnan cu pasa dilanti un Notario. Anualmente ta prepara sigur riba 1000 akte pa bay Notario. Ademas ta prepara mas cu 200 peticion pa precario, huur kiosk casi 68 y tereno pa edificio ta suma mas cu 100. Pues ta hopi producto DIP ta atende anualmente.
“Mi ta reuni regularmente cu empleadonan. Ami tin un maneho di porta habri cu tur colega aki den, pesey e protesta ta straño pa mi”, asina Haime Croes a sigura awe. Di e 55 empleadonan, mas of menos 15 a para pafo awe pa demostra nan malcontento. E ta spera di reuni cu nan pronto pa scucha cu nan banda kico ta e inkietudnan. Croes ta sigur cu e mayoria ta di acuerdo cu su maneho, hibando DIP na e siguiente nivel di servicio na publico.
