Aruba tabatin mester di un detox di politica tradicional. Na 2017, cu apenas 5 candidato riba lista, Raiz a logra un total di 2107 voto. Segun Ursel Arends, pa un chiripa, nan no a logra un asiento. Aunke no a logra drenta parlamento, esey no a kita nan di sigui representa tur esnan cu a pone nan confiansa den nan.
Durante un rueda di prensa, Arends, a sigui splica cu apesar cu nan no a drenta den gobierno, no ta nifica cu automaticamente cu nan ta den oposicion.
A hala un banda y brinda tur oportunidad y espacio pa e gobierno eligi, por a goberna.
Esey no a kita cu durante proceso di e ultimo tres añanan aki cu e partido a vocifera, trece nan opinion dilanti y tambe manifesta nan disgusto unda cu a mira cu cosnan no tabata bayendo bon.
Pa logra nan vision, mester reenforsa nan tribu cu personanan capacita. Pa e motibo aki Raiz a bin cu un candidato nobo, kende ta den persona di drs. Ling Wong. Segun Raymond Kamperveen, tambe miembro di e partido, e ta un persona honesto, integro, humilde y determina.
Entre 1979 pa 1993, Wong a lidera y a traha como hefe di departamento di Asuntonan Economico na Aruba. Wong a fungi como presidente di Banco Central di Antias Hulandes.
Na 1986 pa 1988, e tabata un consehero financiero economico pa e prome gobierno di Aruba.
Durante e mesun periodo dificil aki pa Aruba, pa motibo di ciere di Lago, e tabata e co-autor di e Financial Economic Recovery Plan di Aruba.
Un persona cu e sabiduria pa por institui y guia Aruba Investment Bank como vice presidente y presidente. Un persona cu tin sentimento di deber y responsabilidad. Como miembro di Algemene Rekenkamer, e persona aki a yega di adverti gobierno y parlamento: “Si bo kier evita pa hende haya gana pa bin mete den bo cas, percura pa bo cas ta na ordo.”
Wong ta bay ta weso di lomba den esfuerso di Raiz pa por realisa su metanan. No solamente durante campaña, pero tambe den gobernacion.
Di su parti Ling Wong a comenta cu prome biaha cu a pidi’e pa drenta politica, tabata tempo cu el a caba di studia como economista di e universidad di Amsterdam. E mes no tabata tin interes den politica, tempo cu a pidi’e na prome instante. Pero Raiz a acerk’e na un diferente manera, unda cu a pidi’e pa bira nan consehero y traha un documento di sector primario cu a keda atras na Aruba.
