Presidente di Parlamento Ady Thijsen hunto cu lider di fraccion di MEP tabata na VNO pa haci entrega di un rapport cu nan a skirbi titula: Aruba terug op de rails van deugheid bestuur en deugheid van financiele problemen”. Tabata na e momento cu e Presidente di Parlamento a expresa cu loke Hulanda ta haciendo no ta algo cu Parlamento por acepta. Niun momento un Protocol cu Gobierno a firma cu Hulanda por pasa riba of mina e poder di Parlamento.
Hulanda, el a bisa, ta papia di un posibilidad pa bini cu un KB (Koninklijke Besluit) of “aanwijzing”. “P’esey nos kier pone bon cla cu nos ta un pais autonomo den Reino Hulandes. Aruba tin un Estado di derecho. Aruba tin un diferencia grandi cu Corsou y Sint Maarten, ya cu nan tin un “Consensus Rijkswet” cu Reino Hulandes. Esey ta e nifica cu e Parlamentonan ey tin cu para keto un rato pasobra e pais a haci cierto compromisonan cu Hulanda. Pero Aruba no.”
Thijsen a splica cu Parlamento di Aruba a cambia e ley di LAft, algo cu nan tin derecho di haci esaki a base di Constitucion. “Niun momento un Protocol cu a wordo firma door di dos Gobierno por “schakel uit” un Parlamento. Esey tur hende sa. Esey ta algo cu nos kier pone bon cla. Si nos ta respeta nos mes como Parlamento, anto nunca por traha cu un ley cu ta contra Constitucion.”
Manera ta conoci diabierna mainta tin reunion di Conseho di Minister di Reino. Y riba agenda ta poni e tema di Aruba, esta kico ta bay haci cu e situacion cu a surgi despues cu Parlamento no a cumpli cu Protocol cu Gobierno a firma cu Hulanda na november, 2018. Cu e LAft nobo a practicamente kita e rol di Colegio di Supervision Financiero. For di e momento ey e problemanan a cuminsa cu Hulanda, principalmente Raymond Knops, Secretario di Estado encarga cu Asuntonan di Reino.
No solamente e supervision ta un problema, pero Aruba no a bin ta cumpliendo cu contenido di e Protocol y esaki tin Gobierno di Hulanda hopi rabia.
Gobierno di Reino tampoco ta acepta esaki, pasobra a kita un tarea cu ta regarda nan. Pero Ady Thijsen ta bisa cu nan no ta di acuerdo cu esaki. Un biaha tabatin un compromiso cu Hulanda cu tabata valido pa tres aña pero cu e condicion Aruba mester bini bek riba e bon caminda. “Pero e problema ta cu Aruba a desvia mas ainda … cu mas problema financiero, economico y social. SI tabatin supervision, di con esaki a sosode. Pues e supervision tambe tabata responsabel pa e desviacion ey. P’esey nos a bisa cu nos ta cana otro caminda.”
Gobierno di Reino ta sinti cu nan no tin ningun autoridad mas, ya cu Parlamento a kita esaki for di nan. Riba esaki Thijsen a comenta cu semper, mientras cu Aruba ta den e constelacion aki, Gobierno di Reino a base di Statuut por interveni. “Nan ta toezichthouder caba. P’esey nan a interveni na 2014. Si nos a cambia e ley awor y ta cana e caminda manera e mester ta, e ora nan no tin base pa interveni. No bin cu menasa di KB pasobra ta trece inkietud y instabilidad den e pueblo. Si bo ta kere den democracia y den estado di estado di derecho, y toch haci esey sin base e ora bo ta haci un atentado contra estado di derecho. Esey ruman, nos no por acepta.”
