For di awe mainta a cuminsa circula rumornan di un supuesto fiesta cu a tuma luga ayera merdia, durante ora di trabou, na e oficina principal di Migracion situa riba Vondellaan. A menciona consumo excesivo di alcohol y hasta bailamento striptease. Pio ta cu a organisa un fiesta pa un persona cu no ta traha eynan, pero cu ta frecuenta e departamento encarga cu entre otro maneho di estadia turistico di stranheronan riba nos isla. E rumornan a yega na orea di Minister cu a tuma accion mesora, incluyendo suspension di e hefe, e conocido Sub Inspector di Polis, Icho Matos.
For di empleadonan cu tabata na oficina, a confirma cu berdad tabatin un agasajo chikito pa un amigo di e departamento. Esey a inclui comemento y a trece algo di bebe pa nan, pero cu no ta alcohol. Tambe a sorprende e cumpleañero, un conocido Taxista, cu un mucha muhe cu a haci show. Esey lo a sosode merdia durante nan “break”. A sigura cu no a stroba servicio na cliente pasobra diaranson merdia e departamento ta cera pa publico.
Locual a pasa ta cu empleadonan cu no tabata presente y cu no sa precies kico a sosode ni con el a sosode, a start un redashi y a hiba informacion eroneo na Ministerio di Husticia. Lamentablemente, segun e empleadonan, sin papia cu e hefe prome, Minister a dicidi di suspende y prohibi su entrada na tur edificio cu tin di haber cu IASA y Migracion Aruba.
Icho Matos ta conoci como un Polis masha recto mes den su trabou. Na Aeropuerto generalmente empleadonan ta teme di dje pasobra e nunca ta pensa dos biaha den tuma accion asina cu nota iregularidad na pia di trabou. Como tal tin trahado awo den Migracion ta sinti cu a haci un “set-up” pa purba atacha su bon nomber y integridad.
Di otro banda, e investigacion cu Minister a anuncia un rato pasa publicamente riba Facebook lo mester saca afor kico a sosode di berdad na e oficina di IASA. E unico hecho cuestionabel ta un civil cu no ta traha na e departamento por bin “treat” durante ora di trabou. E realidad ta cu Migracion, DIMAS y Warda nos Costa ta entidadnan bou hopi presion ultimamente y tipo di comportacionnan asina por crea un percepcion cu tin dunamento di regalo pa fabornan haci. Mester haci tur lo posibel pa evita cu publico por tin ni e minimo impresion robes aki.
