Accionnan contra ilegalidad ta continua riba nos isla

Guarda nos Costa ta den un racha di razzia tur e dianan aki. Practicamente tur dia ta keda haya cantidad grandi di ilegal riba nos isla. Hopi ta esnan cu ta move riba nos isla cu no ta naci aki y cu no tin documentonan legal, sea pa estadia of tambe pa traha riba nos isla.

Accionnan di Guarda Nos Costa ta netamente caminda cu tin trabaonan andando. 24ora.com tabata presente na algun di e luganan aki na momento cu Guarda Nos Costa a tene accion. Y practicamente na tur luga cu nan a bishita, a haci detencion di hende cu no por a prueba e momento ey documentonan pa mustra cu nan ta legal riba Aruba of cu nan tin un permiso di trabao.

E hendenan aki ta wordo treci na Guarda Nos Costa. Mayoria di nan ta Venezolano y tin tambe nacionalidad Colombiano den cantidad chikito y otro nacionalidadnan den cantidadnan hopi mas chikito.

Pero esnan cu tin nacionalidad Venezolano ta mas hopi. E accion aki no ta bay caba, pasobra e cantidad di hende cu tin na e momentonan aki ilegal riba nos isla ta hopi y e trabao di Guarda Nos Costa tambe ta hopi pa finalmente pone man riba tur esnan cu no tin derecho di ta riba nos isla y tambe ta trahando. Esnan cu ta culpabel di henter e asunto aki ta, ta esnan cu ta duna trabao na esnan cu no tin permiso di trabao.

Y cu nan sa cu nan ta ilegal riba nos isla. Con largo y con lo saca e hendenan aki, no sa. Tin informacion si di paden cu nan ta wordo saca via vuelonan semanal di Aruba pa Venezuela.

• 

• 

• 

• 

• 

Otronan ta wordo saca via Riohacha, esta Aruba-Riohacha. Ey ta coy un biahe di auto of bus pa Venezuela. Esaki ta diferente forma cu ta uza pa saca e hendenan aki.

Loke tambe a tuma nota ta cu tin cantidad grandi di hende, tur mainta na Guarda Nos Costa para den rij wardando nan buert pa firma, pasobra nan ta pendiente pa un of otro asilo y si nan no tene nan mes na reglanan ta deporta nan.

Si ta e caso nan mester bin tur dia meld na Guarda Nos Costa, firma cu nan t’ey y kisas lo yega un dia cu nan no mester bin mas of lo yega un dia cu nan ta keda paden di biaha, pa nan wordo deporta.

Esey ta e situacion cu tin na e momentonan aki, pero di un otro banda tin cu bisa cu Guarda Nos Costa ta keda haci tur su esfuerso pa finalmente pone un fin na e movecionnan di hende ilegal riba nos isla.

No ta solamente Guarda Nos Costa cu ta yega na pia di trabao. Tin hende ta resisti hasta ora cu Guarda Nos Costa bay den nan accionnan, pero nan ta sa di domina nan. Pero tambe tur dia a tuma nota cu polis ta topa cu hendenan ilegal riba caya, den auto, envolvi den accidente of durante control, ta haya nan den auto y esakinan tur dia ta wordo traspasa pa e personal di Guarda nos Costa, cu ta sigui cu e proceso pa deporta nan for di nos isla.

Trabaonan cu ta sigui, no ta un trabao facil, pero poco poco, pero sigur, esnan di Guarda nos Costa lo sa di controla e situacion di ilegalidad riba nos isla. Mientras cu e frontera ta cera ta mas facil pa pone man riba esnan cu ta ilegal.

Pero si habri frontera, e por bira un problema pasobra e ora lo haya un fluho di cantidad di hende cu ta drenta y nan no ta bay. Nan ta keda ilegal riba nos isla y ta bira un situacion hopi fastioso caminda dado momento ta hiba awa pa lama, pa motibo di cierto cosnan cu por sosode.

Asina mes nan ta drentando via otro destinacionnan cu no ta Venezuela, cu tambe ta sali for di Venezuela, bay otro pais y asina drenta Aruba.