Na comienso di siman tabatin un caso serio di atraco cometi riba un ciudadano na San Nicolas. E persona aki tabata cana den area di WEMA, un poco pabou di warda di polis, ora cu tres hoben a batie y horta tur su pertenencianan.
E modus operandi aki no ta desconoci pa autoridadnan. E mesun grupo aki ta move den caya grandi di San Nicolas, maltratando hende pa kita tur nan pertenencianan. Ta trata di personanan relativamente hoben y ta busca victimanan cu ta bou influencia di alchol of ta indefenso.
A base di denuncia haci door di e victima y investigacion di KPA a logra haya sa kende ta esnan cu a comete e atraco brutal contra di e ciudadano en cuestion. For di mainta patruyanan di San Nicolas a subi caya.
Asina a cuminsa cu un buskeda pa mira si ta topa cu e sospechosonan. Prome cu merdia a haci detencion di e trio atracado. A haci dos detencion prome cu merdia den area di scol na Caya Hose Geerman. Mas o menos dos’or di atardi a pone man riba e di tres sospechoso.
Awo lo cuminsa cu e proceso di investigacion A transporta e sospechosonan warda y Deptamento di JZP tambe a wordo notifica pa atende cu e caso, mirando edad di nan. Ta hobennan ta den mal caminda y aparentemente no ta prome biaha cu nan ta haci e cosnan aki.
