Kico mas lo yuda chauffeur pa no causa accidente banda di WGK? Parce cu mas borchi y verkeersplateau no ta suficiente pa e chauffeurnan pone atencion riba caminda den cierto area. E crusada di Koningstraat cu Emmastraat ta uno caminda regularmente ta sosode accidente.
E chauffeurnan cu ta pasa den Koningstraat no ta pone atencion y despues di pasa riba e verkeersplateau ta keda sin mira borchi y subi e caminda di Emmastraat. E caminda di Emmastraat ta esun di preferencia. Logicamente si bo no pone atencion y un chauffeur den Emmastraat ta pasando cu tur confiansa, e por causa un accidente.
Netamente ta esey a sosode diamars mainta un biaha mas. Riba e foto- y imagennan di video por mira con e Tercel blanco number A-63415 a pasa bay y net un SUV tabata riba su caminda di preferencia. E impacto tabata fuerte. Tin basta daño material. Takelwagen a bay cu e autonan na final di e investigacion na e sitio. Atrobe ta pidi e chauffeurnan pa pone extra atencion riba e crusada di Koningstraat cu Emmastraat banda di Wit Gele Kruis na Playa.
