Pa locual ta e situacion cu e hotel Embassy Suites, caminda tin un caso den corte entama door di e hotel pa forsa Gobierno otorg’e un pida beach.
For di un comienso e mesun director di DIP, ing. Haime Croes, a otorga permiso pa traha un tunnel pa conecta hotel na beach na 2019, laga e compania haci un inversion grandi pa esaki, awo ta bisa nan cu a cambia di opinion y nan no por haya e beach mas. Gobierno di Aruba a aproba e plan di e hotel aki, incluso DIP, cu un hotel inclui como parti di e proyecto.
Relaciona cu esaki, durante un conferencia di prensa, Prome Minister, mr. Evelyn Wever-Croes, a bisa cu el a traspasa tur autoridad pa loke ta infrastructura na e directiva di Departamento di Infrastructura y Planificacion cual nan ta algo cu nan ta atend’e cu ne. Door cu tin un caso den corte, e no ta bay mete den e asunto aki. El a sinta cu e directiva di DIP cu a splic’e e strategia cual e ta para tras di esaki tambe.
Si el a enfatisa cu niun beach na Aruba ta priva, tur beach ta publico y e poblacion local lo keda cu acceso na esaki. Si un hotel, cu ta paga precario pa e palapanan, niun hende por bin sinta bou di nan. Pero e beachnan, e mandatario a enfatisa, tur ta publico.
Tocante Embassy Suites by Hilton Aruba Resort
E compleho di construccion nobo di 8 piso y 300+ suites na Aruba, ta conta cu suite espacioso y exclusivo di Embassy Suites by Hilton, ekipa cu un sala apart, un camber priva y un minibar cu microwave, minifridge y koffiepot. E compleho ta brinda un espacio flexibel pa reunion di 6 mil pia cuadra, un spa di mas di 3000 pia cuadra, piscina den aire liber, un gym y casino, cu lo habri dentro di algun tempo mas. E hotel nobo ta ofrece un restaurant exclusivo, un bar y opcion di un grab-and-go dining pa un snack lihe. E huespednan tambe ta disfruta di servicionan exclusivo, cu ta inclui desayuno di cortesia prepara na bo gusto y recepcion anochi cu snacks y bebida.
