Aki dos pa tres siman lo tin decision den e caso cu Aruba Birdlife Conservation a cuminsa contra Gobierno. Tur esaki pa evita cu ta duna permiso pa construccion di un beach dilanti di Embassy Suites.
Diaranson mainta e caso sigui. Inicialmente el a cuminsa dia 12 di october, pero a pospone te cu prome di november.
E casonan cu tin den Corte ta varios, pasobra tambe tin casonan di LAR di ambos banda.
Na inicio di e siman aki Minister di Asunto di Naturalesa den un conferencia di prensa, a informa cu el a haya tur e documentonan y e peticion di Natura (Di Embassy Suites) ta den proceso cerca e departamentonan concerni.
ABC no kier pa Minister di Infrastructura (Gobierno) otorga e permiso di un beach net na e otro banda di caminda di Embassy. Tin un conflicto pasobra tin Minister di Infrastructura y esun di Naturalesa. Un ta duna permiso di construccion y e otro ta duna e aanlegvergunning pa construi e beach y e ontheffing pa por traha den un area di naturalesa.
Diaranson den Corte no a scucha mas pleidooi di abogadonan, pero si Hues a haci pregunta na e partidonan.
Mayoria di e preguntanan tabata bay riba kico ta tumando luga awo. DIP tabata presenta unda cu a splica cu nan a studia tur e exigencianan cu mester pone por si acaso haya e permiso cu nan a pidi. Tin e tubonan cu ta hiba awa lama.
A pensa riba dos opcion, si ta lag’e manera e ta of ta pone un pida extra. Den ambos caso a mustra cu no mag tapa e boca unda cu e awa ta sali.
A papia tambe di kico ta marine zone y strandzone. E peticion pa e beach aki ta data di 2018 / 2019, pues prome cu e ROPV nobo a drenta na vigor na 2021 y esaki e abogadonan di Natura ta bisa cu Corte mester tene cuenta cu ne.
A discuti cu e kustlijn ta cambia constantemente pero e zona marino nunca. Esey ta defini den ley.
Pero e abogado di Natura y Embassy a bisa cu den e mapa por mira cu un pida di kustlijn no ta cay den e zona marino y cu e beach no ta cay den e zona marino tampoco, sino di beach. No ta mira pakico di tur e discusion. Ademas, den nan pensamento, e aanlegvergunning no ta necesario, manera ta para den ley, ora di un verkavelingsplan manera esun cu tin pa e beach.
ABC no tabata kier pa duna permiso di construccion y tampoco duna aanlegvergunning.
Aki dos of tres siman, depende di con hopi trabou e tin, Hues a bisa cu e lo anuncia su decision.
