Diabierna anochi International Club of DC a tene su Aruba Holiday Gala na Embahada di Reino Hulandes na Washington. Pa prome biaha tanto e embahada y organisacion a ‘host’ un evento dedica na Aruba. E International Club of DC tin 47 mil miembro di mas cu 90 nacionalidad y nan ta partner cu mas di 80 embahada na Washington. Nan ta ofrece experiencianan cultural internacional incluyendo arte, musica, baile, teatro y cuminda di rond mundo den un ambiente pa conoce, socialisa y network cu otro profesionalnan internacional.
E Aruba Gala mester a sosode na maart pero debi na COVID-19 no por a bay door. Minister Plenipotenciario Joselin Croes hunto cu Sanjaya Hettihewa di ICDC a organisa un anochi espectacular cu a promove nos isla entre un grupo grandi di profesionalnan na Washington. E evento no a costa Land Aruba nada paso ICDC ta bende ticket pa atende su eventonan, ticket pa e Aruba Gala a cuminsa na $75,- pa persona. Papiamento Rum a sponsor bebidanan pa e anochi ameno y e cherry riba e bolo tabata e musica Arubano.
E anochi a gosa di artistanan musical Arubano Edjean Semeleer y Chris Kross. Aruba Tourism Authority North America su director, Ed Malone tabata na e evento hunto cu Kim Riddle y ATA a duna un bunita presentacion di nos dushi isla y tur huesped a ricibi un ‘gift bag’ cu informacionnan valioso pa promove nos isla. Maureen Bunyon, periodista Arubana-Americana di television y co-anchor na Washington pa mas cu 22 aña tabata na e gala como tambe Dr. Edward Cheung ingeniero Arubano di NASA y su esposa.
Keshi yena, carni stoba, quesillo y dulce de leche den forma di mapa di Aruba tabata algun di e specialidadnan local cu por a disfruta di dje. E anochi a conta cu presencia di diplomaticonan di diferente pais y Aruba a resalta den circulonan importante na Washington. Parlamentario Miguel Mansur (Accion 21) kende ta na e capital Merca esta Washington pa un conferencia internacional di lidernan LGBTQ tambe a atende Aruba Gala hunto cu su colega Melissa Gumbs di Sint Maarten kende tambe ta na e conferencia.
