Awe mainta, faltando 5 minuut prome cu e cuminsa cu e conferencia di prensa pa anuncia final di FASE otro luna, a informa Minister Glenbert Croes cu tin un situacion serio na Departamento di Progreso Laboral (DPL) y cu e mester bay mesora den cuarentena. E decision aki ta pa rasonnan di prevencion pasobra un coordinador di e Minister ta contagia cu Coronavirus.
Parce cu un señora, coordinador di e Minister, a test positivo awe mainta. E reto ta cu e señora ta sinta na oficina di DPL, pues a haya nan forsa pa cera e departamento pa dos siman largo. Y e hecho cu e coordinador a reuni siman pasa cu Minister Glenbert Croes den su oficina, precisamente riba tema di FASE, a haci cu a pidi e mandatario pa ta miho e keda su cas pa mira si e ta desaroya sintoma.
E reto aki ta presenta precisamente na momento cu Gobierno a anuncia awe cu dia 15 di augustus ta ultimo dia pa entrega peticion di FASE. Cu e realidad aki awo, ta obliga tur aplicante pa haci esaki online, uzando e website di DPL y FASE. No por ricibi bishita mas na DPL por lo pronto.
E situacion aki di Covid-19 ta atacha henter mundo y no ta discrimina. Ata nos ta constata cu hasta un Minister awo ta den cuarentena preventivo, pa evita cu si acaso a contagi’e, pa e no sigui plama e virus aki inconscientemente.
