Vicario Episcopal na Aruba Andres Makowiec, staciona na Parokia di Savaneta, den declaracion duna a bisa cu e casonan nobo ta algo cu tur hende tabata spera for di momento cu frontera a habri. Misa ta consciente di e situacion cu ta uno preocupante pero no mester bay den panico.
Despues di e anuncio dialuna anochi por a tende mil y un cos, pa cual e ta conseha pa semper sigui e canalnan oficial di informacion pa haya e informacion corecto. Den e cuadro di e anuncio nobo aki, el a apela na creyentenan pa sigui e protocol vigente na misanan, cu ta papia di mantene distancia social y higiena.
Desde cu e misanan por a cuminsa brinda servicio, a resulta cu pa mantene e Protocol, no por a ricibi hopi creyente na misa. Esaki a trece cu ne, cu diferente parokia ta brinda mas cu un servicio religioso. Si tin cambio, esaki ta un anuncio cu Obispo mester haci, basa riba normanan di Gobierno. Esaki ta momento cu fielnan mester yega misa, pa resa pa humanidad. No mester kita e custumber di bay na cas di Dios. “Keda resa na cas mester ta e ultimo recurso,” Pastoor Macowiec a bisa. Y a agrega ta bon pa Parokia y parokianonan sigui cu e trabou cu a bin ta haciendo.
Durante e temporada di Toque De Queda varios misa a cuminsa cu transmision di servicionan religioso y ainda tin e transmisionnan aki tumando luga. Na Savaneta e transmision di diadomingo a sigui, apesar cu tin e servicio cu porta di misa habri. Pa pastoornan, segun e vicario, nan a haya un experiencia nobo, uzando tecnologia pa yega cerca e fielnan. No por para bida di iglesia, y si tin mas hende cu kier acudi, cu tin e capacidad, e ora por tene servicio extra, manera a sosode na Playa. Parokia na Savaneta no a experencia e problema aki, pasobra a haci uzo di tur espacio, manteniendo protocol, y hasta pone stoel riba altar of bou di afdak na banda di misa. E pandemia ta e tormenta cu mundo ta haya. Tin esnan cu ta sinti nan ta hoga, e ta pidi pa dal e grito “Señor salba nos”.
