Centro Alegria ta habri oficialmente pa personanan cu limitacion

Stichting Oasis of Love den un conferencia di prensa a anuncia e trabounan cu nan a bin ta haciendo y kico por spera di nan organisacion proximamente. Presente na e conferencia di prensa tabata e presidente Lila Mackay.

El a papia di un proyecto cu tabata den tapara y cu nan mester a lansa for di luna di maart. Sinembargo pa motibo di coronavirus, a wanta esaki. Ta trata aki di apertura di Centro Alegria, cu ta un centro pa personanan cu limitacion di 10 pa 55 aña. Na e centro ta ricibi nan y organisa diferente tipo di actividad pa e clientenan aki.

Centro Alegria cu update riba loke nan a haci

Posted by 24ora on Tuesday, August 4, 2020

Stichting ta traha cu diferente fundacion pa yuda esnan den necesidad di alimento y material pa muchanan cu tin bay scol.

E stichting ta funciona for di 2013 y ta yuda coaching di hobennan, ta yuda den  barionan y duna un man na hobennan cu a drop-out.

Bea Geerman ta un di e personana cu a bin ta trahando riba e proyecto aki pa basta tempo y e ta sinti un alegria inmenso di por anuncia finalmente e apertura. Bea Geerman tin un ruman cu limitacion y e experencia cu nan a pasa aden cu ne a pone cu e famia a dicidi pa bini cu Centro Alegria, situa na Papilon. E ta un cas di famia cu a coverti den un centro pa atende personanan cu limitacionnan.

Ta cuminsa cu un vakantie camp, cu ta 10 pa 14 di augustus, for di 8’or di mainta pa 2’or di atardi, y ta inclui cuminda cayente.  Pa inscribi pa e camp por pasa entre 9’or y 12’or na e camp, of yama 5940378 5921272.

Dia 17 di augustus ta cuminsa oficialmente cu e “dagverblijf” for di 8’or di mainta pa 5’or di atardi.; tin opcion di mita dia mainta of atardi. Por pasa na e centro pa mas informacion.