Diaranson, 27 di november a tuma luga un atardi hopi special, caminda cu SVb tabata tin un anuncio hopi importante pa henter comunidad, den cuadro cu e desaroyo cu SVb ta pasando aden pa drenta aña 2020.
Diasabra tabata un dia di hopi movecion. Bao di supervision di Gladys Kock, pa mas di 12 ora a percura pa move e containernan cu tin staciona na SVb despues di 23 aña, den preparacion pa e evento cu a tuma luga diaranson atardi.
Durante e movecionnan aki, diferente colega a comparti e momentonan aki. Ta trailernan cu pa 23 aña tabata espacio di trabao pa trahadonan di SVB. Hopi memoria, hopi anecdota e trailernan aki a conoce, director di SVb ir. Edwin Jacobs a conta durante e ceremonia di diaranson atardi.
E momento ey a pasa y ta recuerdo so ta keda, segun Jacobs. A comparti e momentonan aki cu coleganan den e chatgroup di Vita for Us y un mensahe di un colega a demostra e esencia den cual e organisacion ta pasando aden.
Colega Christian Garcia a manda e mensahe aki bisando “The future is under construction”. Futuro ta bao di construccion. Y realmente den SVb ta bezig ta construyendo futuro. Dos siman pasa tabata tin e honor pa tin e minister cu nan pa haci e lansamento di MiSVb, un futuro cu ta construyendo pa e clientenan y awe e minister a bin un biaha mas pa e anuncio importante aki.
Futuro ta bao construccion, Jacobs a ripiti. SVb, manera cu a indica algun tempo atras den un email na trahadonan, SVb ta ambiciona di ta un bon dunado di trabao. SVb a propone su mes y ta ambiciona pa transforma e organisacion cu na e momentonan aki ta caracterisa pa un herarquia fuerte. Un organisacion hopi centralisa y un organisacion basa riba funcionnan. Ta desea y ta ambiciona pa yega na un organisacion cu un structura plat. Un organisacion decentralisa y un organisacion basa ariba rolnan.
SVb ta ambiciona un organisacion caminda cu e coleganan ta wordo mas empodera. Por asumi mas responsabilidad y mas ainda cu tin caba un compromiso mas fuerte cu e institucion.
SVb a propone su mes pa den e proximo añanan aumenta e placer na trabao di e trahadonan. Tur esaki cu e unico meta pa SVb por sigui cumpli cu comunidad dunando servicio di calidad segun e ultimo tecnologia, pero tambe den cuadro di su aspiracion pa alcansa siguridad social pa tur. Na final pueblo di Aruba su bienestar ta e centro di e atencion. Pero cu trahadonan cu tin placer den e trabao, personanan motiva, SVb por alcansa e metanan ey.
Tur e ambicionnan aki tin cu wordo traduci den espacio di trabao. E edificio cu ta bay ta construi tin esey como meta. Traduci e ambicionnan pa e organisacion nobo den espacionan di trabao di calidad, espacionan di trabao moderno, espacionan di trabao innovativo, pa asina SVb por keda cumpli cu comunidad.
No solamente e parti nobo ta bay ta enfoke riba e transformacion y e traduccion den espacio. E edificio existente for di 1981, tambe ta bay yega su momento pa e wordo rediseña na su debido momento. Tin e conviccion cu pa 2030 tur servicio cu SVb ta ofrece comunidad na Oranjestad ta wordo duna for di oficina principal di SVb na Eagle. Tur bao di un solo dak, den un sistema di trabao diferente y nobo, moderno, innovativo, caminda cu coleganan ta keda motiva pa sigui brinda comunidad e servicio di calidad cu nan ta aspira.
E proyecto aki lo no ta realisabel sin sosten di minister di salubridad, turismo y deporte, Dangui Oduber, kende ta gradici’e pa su sosten, na su ideanan aki di SVb. Tambe Raad van Advies ta wordo gradici di parti di e director. Awe por a mira e prome paso concreto di SVb, pa loke ta su edificio.
Thomas Quandus ta e arkitecto di e diseño di e edificio. Segun Jacobs, sin su contribucion esaki no tabata posibel.
Fuera di esey, e director di e Banco di Seguro Social, a splica el a haya un email di su colega Jorge Faro, pa inform’e cu e payroll di mas grandi cu SVb ta paga den un aña na Aruba, ta cla pa wordo pasa pa asina diabierna awo pensionadonan por cobra nan pensioen di luna di december mas nan kerstbonus.
Durante di e evento aki minister di salubridad publico, Dangui Oduber tabata tey presente, cual Jacobs a gradici pa su presencia.
