Na vispera di su viahe pa Hulanda e mandatario encarga cu Finansa Publico, Asunto Economico y Cultura a duna e siguiente mensahe na comunidad di Aruba relaciona cu status financiero di e Presupuesto 2018. Na momento cu Gabinete Wever Croes ta drenta gobernacion ela hereda un crisis financiero, na unda na November 2017, APFA, AZV, SVB no ta wordo paga, Presupuesto di 2017 tin un extra deficit di 130 miyon, projectonan cu mester a spin off e economia di pais Aruba p.e. Citgo no ta den funcion, entradanan di belasting a keda cu 50 miyon atras. E gobierno di Aruba awor ta wordo confronta cu e recibo di a wordo goberna na un mal manera pa 8 aña, un mal maneho financiero cu a hiba nos pais na un supervision financiero, cual ta dunabo como pais extra retonan segun e mandatario di Finansa. Esaki ta exigi vision, curashi y madurez pa busca e solucionnan necesario pa e retonan nos dilanti. Ta sumamente importante pa informa nos pais cu a traha riba Presupuesto 2018 y a manda esaki pa Raad van Advies pa conseho y despues lo bin pa Gobierno pa por contesta e preguntanan y despues manda pa Parlamento pa asina e por wordo trata.
Presupuesto 2018:
E mandatario a trece dilanti cu Presupuesto 2018 di nos pais, ya caba mester a wordo entrega promer cu 1 di september 2017 na Parlamento di Aruba pero esaki no tabata e caso. E gobierno anterior a hiba un maneho caminda cu largo bay ta manipula cu cifra, largo bay a traha na un manera incidental, largo bay a hunga cu e credibilidad financiero di nos pais. Den e caso aki Gabinete Mike Eman no por a produci un presupuesto pa nos pais Aruba. Esaki ta pone cu e gobierno nobo mester a traha deligentemente pa asina por presenta un Presupuesto 2018 cu tur e risiconan y tambe mester a trata cu e recibo cu nos gobierno a haya di e mal gobernacion anterior.
Pa pone den perspectiva na momento cu e gobierno anterior a sinta, e debe na 2009 tabata core den 2.2 mil miyon florin, caminda cu di cada florin 49,9 cent ta locual tabata bay pa cubri na debe. Na 2009 e interes cu tabata paga pa aña ta 116.4 miyon florin. Awe e gobierno nobo ta haya e recibo despues di 8 añanan di mal gobernacion di Gabinete Mike Eman, esaki ta pone cu den Presupuesto 2018 nos ta wordo confronta cu un deficit 276 miyon florin, caminda cu nos debe ta 4.3 mil miyon florin, di cual di cada florin 93 cent tin cu bay pa cubri debe y Aruba ta pagando na interes 216 miyon florin, cual ta nifica mas cu 100 miyon extra na pago di interes. Esaki ta e situacion cu pais Aruba ta enfrentando awor, e recibo cu e gobierno nobo ta atende cune.
E scenario awor ta duna como resultado cu e debe di pais Aruba awe na 2018, ta 2 biaha mas halto cu na 2009. E interes cu mester paga tambe awor ta casi 2 biaha mas halto cu na 2009. E Presupuesto 2018 ta 125 miyon mas halto cu na 2017 debi na entradanan pre-mira di refinería cu no tey. E projeccion di entrada cu tabata ser infla tampoco tey, pagonan cu mester cuminsa na PPP’s (Public Private Partnership) mester ser inclui, e inversionnan den e sector social cu a cai atrás mester ser inclui. Tambe e inversiónnan pa crea seguridad den comunidad mester ser inclui hunto cu un infrastructura cu a keda atrás.
Aruba mester financia e aña aki si no adapta e presupuesto un suma di 743.1 miyon florin. Esaki mester aprobación di Hulanda y un vista serio ariba finanzas publico pa e banconan den exterior.
E realidad financiero a sali na claridad y prespuesto 2018 ta un reto grandi cu gobierno a bin ta atendiendo cune.
