Ta bon conoci cu durante e decadanan 50 y 60 tabata existi un division grandi na Aruba y cual tabata wordo fomenta pa e partidonan politico di e temponan ey.
Sinembargo tabata reina tambe e deseo ferviente bao di nos ciudadanonan pa obtene un status separa den Reino Hulandes. Betico Croes, den cuadro di su strategia pa concretiza e deseo di nos pueblo, tabata di firme conviccion cu mester uni nos hendenan pa por logra e libertad aki. Y Betico a mira den introduccion di un himno y un bandera instrumentonan importante pa logra e union den e pueblo Arubano.
Introduccion di nos Himno
Asina pues un Comision di Himno a ser institui dia 21 di januari 1976 cu a haya e tarea pa conseha gobierno si mester haci e cantica “Aruba Dushi Tera” himno nacional y si esaki ta afirmativo, ki sorto di ritmo, sea marcha of wals, tin cu wordo uza. E comision tabata consisti di e siguiente miembronan: Maybelline Arends-Croes, Rufo Odor, Juan Chabaya (Padu) Lampe, E. Bennett, Hubert (Lio) Booi, Rufo Wever y Juan E. Wever. E comision den forma unanime a vota na fabor di interpretacion di e himno den e ritmo di wals. E comision a duna su recomendacionnan na Gobierno Insular y dia 16 di maart 1976 Eilandsraad di Aruba a aproba ‘Aruba Dushi Tera’ como himno oficial di Aruba.
Introduccion di nos Bandera
Riba e mesun fecha di 21 di januari 1976 a ser instala un Comision di Bandera cu e tarea pa traha riba un diseño di bandera di Aruba. E comision tabata consisti di: Julio Maduro, Wouter van Romondt, Ronald Donk y Juan E.Wever. Pa cu e bandera a tene un encuesta bao di nos pueblo pa cada hende duna nan contribucion. Ora e trabaonan aki a caba a busca asistencia di e profesor pa diseñonan di bandera, esta sr. Whitney Smith cu su asistente sra. Sarah Bollinger di Boston. Mescos cu tabata e caso cu e himno di Aruba, riba dia 16 di maart 1976 Eilandsraad a aproba e diseño di e bandera oficial di Aruba. Betico Croes a hipoteca su cas pa paga y busca e promer banderanan for di Merca y Colombia. Y dia 18 di maart 1976, den presencia di miles di ciudadanonan, e acto oficial a tuma lugar den Wilhelminastadion, caminda a proclama oficialmente nos Himno y Bandera.
Pakico un himno y bandera?
Den un pais, unda ta reina e deseo ferviente pa sali for di e constelacion Antiyano y bira un pais autonomo den Reino Hulandes, bo mester promove e simbolonan di union y libertad, unda cu cantando bo himno bo ta expresa bo amor pa bo pais y hisando bo bandera bo ta inculca nacionalismo bao di bo pueblo. No mester lubida tambe cu despues di e introduccion di nos himno y bandera hopi otro evenemento y accion historico a tuma lugar, entre otro e Referendum di 25 maart 1977 y Augustus Scur 1977 y tur esaki den cuadro di e lucha di nos pueblo pa logra su libertad. Y a dura apenas 7 aña despues di introduccion di nos himno y bandera cu ya nos pais a logra su Status Aparte durante e Conferencia di Mesa Rondo dia 12 di maart 1983.
Un dia di reflexion
Dia di Himno y Bandera ta un dia historico y di reflexion pa un y tur den nos comunidad, ya cu introduccion di nos himno y bandera tabata instrumental den e logro di nos Status Aparte entrante 1 di januari 1986. Sin e himno y bandera nos ciudadanonan lo no tabata tin nada pa gara na dje p’asina trece e union tan desea bao di e pueblo Arubano. Ta p’esey riba e dia aki partido MEP ta gradici nos Libertador Betico Croes pa su vision y determinacion y tambe na nos lider honorario sr. Nelson Oduber cu tabata e diputado encarga cu e realizacion di nos bandera y nos himno nacional “Aruba Dushi Tera”.
Ta p’esey pueblo, ban celebra den grandi nos Dia di Himno y Bandera diadomingo awor. Hisa bo bandera cu orguyo y cana cu bo cara na laira, pasobra awe nos ta un pais liber den Reino Hulandes. Pabien pueblo Arubano cu nos gran dia!
