Diadomingo anochi un hoben di diescinco aña por poco a perde su bida. El a cay den un buraco di pos y casi a bay fondo. Su wela, Stella Feliciana ta hopi preocupa cu e situacion aki.
E wela hunto cu su nieto a bin den e area di Linear Park p’asina mira e brommernan cu tabata monta show. E nieto di diescinco aña ta un fanatico di brommer. Ora cu e nieto a pasa cerca di e edificio di ex-Havana, el a cay den un buraco y por poco a bay te fondo. El a logra wanta ariba y subi bin tera. E wela no tabata sa cu e nieto a cay, ta ora el a regresa tur sushi a not’e. E hoben por a perde su bida, debi cu literalmente a cay den un pos. Debi cu tabata anochi, e wela no por mira e buraco bon. A regresa mainta y a topa cu e buraco. E nieto a perde tur cos, su pañanan, tas, keds y telefon celular.
Pa evita algo pio pasa, e wela a acerca DOW y notifica nan di e caso aki. A ricibi un trato na DOW, di cual den apenas un dia di trabou a pone un baricada pa avisa hende di e peliger aki. DOW no por haci mas cu esey mirando cu ta trata di un edificio priva, DOW no ta permiti pa traha riba tereno di hende. E wela, Stella Feliciana a adverti e comunidad henter riba e peliger aki, mirando cu hopi hende ta haci uzo di Lineark Park y tin un parke di atraccion algun meter leu. Ta spera cu pronto e doñi di edificio atende cu e buraco aki mirando cu un situacion manera cu a pasa diadomingo, lo por a termina mucho mas pio.
