Un accidente cu a causa basta caos y susto a tuma luga riba caminda di Jaburibari. Un vehiculo a bay dal den un palo di luz y bandona sitio.
Esaki a sosode den careda di 4:00 pm ora un chauffeur a bin dal den un palo di luz y pone cu tur waya a bin abou. Trafico a tranca mesora. Pero e intencion di e chauffeur no tabata di keda na e sitio.
A tuma nota cu el a cuminsa haci maniobra pa bandona sitio y un rato despues a logra tambe. Mientrastanto polis tabata yegando e area.
E vehiculo riba velocidad halto a ranca bay y te hasta a pasa dal otro vehiclo riba caminda. A cuminsa un persecucion formal for di Jaburibari, drenta Calabas y caba na Moko.
Un patruya a logra para dicho vehiculo, mientras e demas patruyanan tabata yega pa reenforsa. E chauffeur a lanta cu nan y resisti formalmente. Agentenan a deten’e na e sitio. Como cu e no tabata coopera, a opta pa transport’e den e patruya mes.
