Wardacosta a tuma nota cu regularmente personanan ta sigui tira pisca cu harpoen sin cu nan tin un permiso. Den e ultimo temponan aki, Wardacosta a haya nan mes cu diferente di e casonan aki. Wardacosta ta corda tur persona y usario di harpoen riba e leynan vigente pa uzo di harpoen.
Na november 2020 Gobierno di Aruba a introduci un asina yama ‘gedoogbeleid’ cual ta haci e uzo di un harpoen den lama legal. Sinembargo, esaki ta mara na diferente condicion cu e usario mester tene su mes na dje. Un suplica ta bay pa e usuarionan studia e condicionnan aki bon, pa por compronde kico ta permiti ora di pisca cu harpoen. Den caso cu viola un di e condicionnan aki, e ‘gedoogbeleid’ lo no ta na vigor mas y e ambtenaar di Wardacosta of Polis por actua a base di e ley existente (landsbesluit verboden onderwaterjachtmiddelen).
Wardacosta ta pone enfasis cu den e zonanan cora, manera indica riba e mapa adhunto, no ta permiti pa tira pisca y tampoco no ta permiti pa ta den posesion di un harpoen. Unico excepcion pa posesion di harpoen den areanan cora ta si e harpoen ta poni den un boto pa asina por sali pa bay den areanan permiti of drenta bek. Un persona no por sali for di canto di lama y landa cu su harpoen den man pa asina e bay den e area cu ta permiti, vice versa tampoco no ta permiti. Pues, cu otro palabra, no por pasa landa den area prohibi cu harpoen den man pa yega tera.
Wardacosta lo actua debidamente ora tuma nota di tiramento di pisca sin cu tin permiso pa esaki. Piscadonan cu kier haya un permiso pa pisca cu harpoen por bishita Santa Rosa pa ricibi tur informacion tocante e permiso. Wardacosta ta informa cu personanan cu ta mantene nan mes debidamente na tur e reglanan manera stipula den e ‘gedoogbeleid’ lo no haya nan mes den un situacion unda cu autoridad lo mester actua contra nan.
