Den un conferencia di prensa Eduard McCollum, vocero y responsabel comercial di Consulado di Republica Dominicana aki na Aruba, a reacciona riba e accion di protesta di un grupo di Dominicano, kendenan ta exigi retiro / cambio di Consul na Aruba y transparencia den uzo di presupuesto di e Consulado.
E tabata compaña pa Winston Tavarez, di Fundacion Dominicano Stichting Arubaanse Juan Pablo Duarte (Presidente); Ana Ramon Campos de Garcia, presidente di Fundacion Folclorico Dominicano na Aruba.
E conferencia ta relaciona cu e puntonan di preocupacion di e grupo di Dominicano, cu a yega como un sorpresa pasobra nunca a informa nan di e intencion aki. Y no ta tur e nombernan por a lesa riba e documento tampoco. E ta carece di legalidad pasobra e firmantenan no tin number di cedula ni adres na Aruba.
Pa loke ta e ausencia di Consul na Aruba, McCollum a bisa cu e fechanan no ta cuadra. Pero si ta berdad el a drenta y sali di e isla varios biaha. E ultimo bes cu el a sali di Aruba tabata me-mey di maart cu e intencion di bolbe fin di luna, y esaki tabata relaciona cu e votacion di e pais cu a keda cancela. Mientras cu e ta pega na Rep. Dominicana, el a firma tur e documentonan necesario. Ademas, no tin ley ta bisa cu e Consul mester ta na Aruba pa funciona, ya cu e tin un team cu no a stop di traha durante e temporada di crisis. Pero mester a haci e cita via di yamada of e-mail.
Pa loke ta duracion di renobacion di paspoort, el a bisa cu esaki ta falso. Mayoria di paspoort ta keda cla den 5 siman, pero mester cumpli cu tur e exigencia y documentonan na ordo. Den pasado Junta Central Electoral tabatin un funcionario aki, pero mester a lague bay pa motibo cu no por a cubri su gastonan. Dominicanonan casi no tabata haci uzo di esaki. Tin un Junta na Corsou, unda ta saca e actanan necesario. Desde 2018 pa por haya un paspoort mester tin un cedula. Antes tabata acepta un acta di nacemento, pero awo no mas.
Den caso di e Plasa Juan Pablo Duarte, mester haci un colect pa drecha esaki. Consulado no ta responsabel pa mantencion of renobacion di e Plasa. Placa cu nan ta haya ta bay pa paga huur, awa, coriente, telefon, mantencion, etc.
Pa finalisa, McCollum a bisa cu si tin Dominicano den cualkier problema, y no avisa e consulado, nan no por yuda nan.
