Casi 40 mil caso trata den Corte durante 2019

Durante un conferencia di prensa awe merdia Corte a duna dato relaciona cu nan relato anual 2019. Loke cu a resalta ta cu casonan penal a baha, mientras cu casonan civil a subi. Y esaki tin su splicacion. Corte Comun di Husticia di Aruba, Corsou, Sint Maarten y di Boneiro, Sint Eustatius y Saba a presenta su relato anual di aña 2019 na publico.

Corte como organisacion a sirbi cu e estado di derecho den 2019 cu 43 hues y 136 colaborado den diferente funcion di asistencia. Presente na e conferencia di prensa tabata Presidente di Hof na Aruba mr. Jacques Keltjens; Persrechter Debby Angela y Ernest Kross.

Cantidad di caso

Den 2019 a drenta 39.189 caso den Corte di prome instancia, un subida leve di 5% compara cu 2018. E subida mas halto ta den area di derecho administrativo (‘bestuursrecht’), caminda tabata tin en total 2.301 caso, un subida di 24% compara cu e aña prome. E casonan di LAR, ‘Landsverordening Administratieve Rechtspraak’, a bira dobel y tabata tin un subida pa loke ta trata casonan di stranhero debi na e situacion economico y politico na Venezuela. Nan a subi du 290 caso na 2018 pa 550 caso na 2019.

Corte ta duna su relato anual 2019

Corte ta duna su relato anual 2019. Click link pa mas https://24ora.news/2UB6UyH

Posted by 24ora on Friday, June 12, 2020

Pa tratamento di casonan penal, Corte ta depende di loke Ministerio Publico ta manda pa nan. E cifranan ta mustra cu tabatin un caida di casonan cu a yega Corte den 2019 compara cu 2018. Na 2018 tabatin 1027 y den 2019 a trata 954 caso penal. Esaki tabata debi principalmente debi cu den 2019 a trata poco casonan (9) grandi cu ta tuma mas tempo for di Corte. Asina tabatin caso IBIS cual a tuma mas cu 60 ora den corte y parti den dos sala; caso Locusa mas cu 10 ora; Caso Basora mas cu 8 ora; caso Chino mas cu 8 ora; Cafe mas cu cinco ora. Pues tur a tuma hopi espacio pa cual no a trata mas caso cu e aña anterior. E no ta nifica cu tabatin menos delito. Tin 38.903 caso cu a finalisa, esaki ta 4% mas cu e aña prome. Aki tambe por mira cu e subida mas substancial ta den e area di derecho administrativo (‘bestruursrecht’). Por mira e subida aki principalmente na Aruba y Corsou. Casonan di famia den 2018 tabata 160 caso y a subi pa 861; E total di casonan den apelacion cu a drenta den 2019 ta 1.327, esaki ta representa un caida leve di 2% si nos compara cu 2018. E bahada mas substancial ta den casonan civil, casonan tocante labor y huicionan sumario. A finalisa un total di 1.123 caso den apelacion, esaki ta representa un subida di 20% compara cu 2018.

Ningun caso penal no a bini bek Corte

Cu orguyo Corte ta informa cu Corte Supremo di Husticia na Hulanda no a destrui, ni tampoco manda ningun caso penal bek pa Corte. Corte Supremo a trata un total di 33 asina yama ‘casonan penal di Caribe’, den cual ya caba tabata tin un sentencia di Corte den apelacion.

Huesnan local

Den 2019 tabata tin tres hues den trayecto di formacion na Corte. Dos di nan, Kimberly Lasten y Angeline Martijn a termina e trayecto aki di forma exitoso na 2019 y a keda nombra como miembro di Corte, sede Corsou. Nan a instala na september 2019. Jane Jansen, kende tambe ta un hues local na Aruba, a termina cu su trayecto di formacion for di 2018, y entrante prome di januari 2019 el a keda nombra como miembro di Corte, localidad Aruba. Mr. Jansen a keda instala na februari 2019. Tin un candidato mas den e trayecto di formacion (raio: ‘rechterlijke ambtenaar in opleiding’) y na januari 2020 un ‘raio’ nobo di Boneiro a cuminsa cu e trayecto di formacion.

Finansa

Corte a alcansa un resultado positivo di f 147.000 den 2019. Por atribui e resultado aki pa gran parti na algun ingreso incidental, cu no ta origina di e operacion regular di Corte. E ingreso y gastonan incidental aki ta relaciona cu varios post di añanan anterior. E resultado di Corte, pa loke ta trata su operacion regular, ta f 50.000. Esaki ta un resultado particularmente positivo, pa motibo cu Corte mester a corta casi f 1.5 miyon (algo mas cu 4%) den su gastonan. Bestuur a hiba un maneho di reduccion stringente ariba su gastonan pa por a cumpli cu e obhetivo cu e tabata tin. A logra esaki pa gran parti tambe y cu esaki a (of en todo caso ta parse) cu a alcansa e limitenan di reduccion di gasto y di eficiencia operacional.