Mayornan y alumnonan di Scol Paso pa Futuro y SPO St. Cruz hunto cu nan abogado Desiree Croes a yega Bestuurskantoor pa entrega un carta di e muchanan na Minister President Evelyn Wever-Croes. Nan no ta di acuerdo cu loke e mandatario ta haciendo di muda e klasnan patras di Setar Playa pa Seroe Blanco. E minister a bisa di a papia cu e scol, pero segun e cabesante Zelda Steenen no tabatin dialogo.
Lampe ta sigui riba e posicion pa muda e muchanan di Scol Paso pa Futuro. Tin un scol caba pa muchanan special y awo kier cambia esaki pa uno cu no ta adapta p’e muchanan cu tin necesidadnan special. Den niun carta e cabesante no a bay di acuerdo pa cambia e scol. E muchanan ta esnan mas afecta cu e situacion aki. Si muda e Scol Paso pa Futuro tin cu hinca e muchanan na SPO St. Cruz y aki no tin suficiente luga. Steenen a bisa como cu Minister di Enseñansa Rudy Lampe no kier cambia su decision, e tampoco lo cambia di dje.
Un mayor a pidi Minister President pa duna atencion na e situacion aki, pero tambe pa scucha e muchanan. SIMAR tambe tabata presente y Josephine Albertus a expresa cu scol a cuminsa bek y docentenan tin yen stress atrobe pa decisionnan cu Minister di Enseñansa ta tumando. Loke e mandatario ta haciendo no ta bon, p’esey SIMAR lo keda lucha p’e veld, e presidente di SIMAR a bisa.
Un di e mayornan a pidi Minister President pa tene cuenta cu e bienestar di e muchanan. E decisionnan tuma aworaki no ta na bienestar di e muchanan. Nan ta pidi Minister President pa scucha e puntonan di argumento valido y pa yega na un solucion.
Minister President a ricibi e carta y ta considera e muchanan di e scol aki uno hopi special. El a mira hopi di nan florece y e forma cu e scol ta traha ta di alma y cuerpo. E ta impresiona cu Scol Paso pa Futuro. E no ta algo facil y lo purba sigui traha duro pa por yega na un solucion, segun Minister Wever-Croes. Cabesante Steenen a splica Minister President di un reunion cu Minister Lampe, kende a bisa di no cambia su decision. E scol a bin mustra nan inkietud riba tur e puntonan y di cuanto lo costa Aruba pa “swamp” e muchanan for di otro. Tambe el a bisa cu Minister Lampe no ta habri pa scucha loke nan tin di bisa.
Segun Minister President e lo atende cu esaki y pa asina wak ki solucion lo por yega pa e diferente problemanan di enseñansa. E ta kere den i dialoga, papia y compronde. E lo kier haya mas informacion di e reunion entre Minister Lampe y Steenen pa asina por sigui di eynan. Segun Wever-Croes, e lo no atende e situacion aki den Ministerraad mirando cu tin yen otro punto den agenda. E lo ta dialogando dialuna cu Minister Lampe riba e situacion di Scol Paso pa Futuro.
