For di algun tempo caba Unit Narcotica a traha incansablemente riba un caso grandi di exportacion di droga for di Aruba cu destinacion Hulanda. E grupo aki tabata manda droga den diferente artefacto. Droga den “transmission” di auto, droga den “compressor” di airco nobonobo. Cumpra airco y habri compressor y yena esaki cu droga. Den cashi tambe a yena droga. Asina tabata purba burla di autoridad. Pa algun tempo caba varios compania no ta mandando container Hulanda.
A stop esaki pasobra ora e container yega Hulanda y tin droga aden, ta duna un multa di 10 mil Euro. Den e caso aki e unico compania cu ainda ta manda container ta cauteloso. Ta informa Douane Recherche riba cada movecion sospechoso.
Den un di e casonan specifico aki, un sospechoso cu su nomber no ta aparece den e documento, tabata yama e trahadonan di e compania constant pa puntra si e mercancia a sali caba pa Hulanda. Y asina el a “redflag” cu a trece e container bek un dia prome cu esaki a sali pa Hulanda. Douane Recherche a haci un control mas riguroso y a bin descubri den e caso aki e droga scondi den aparatonan.
Trahando den ekipo, Unit Narcotica hunto cu Douane Recherche a detecta un cargamento grandi di mas cu 140 kilo di cocaina saliendo for di un containter pa Hulanda.
Cu hopi strategia, investigacion y cu cautela, a haci diferente entrada hudicial rond Aruba cu a conduci na diferente detencion.
A detene e hombernan di inicial: Y.M.T. naci na Colombia di 45 aña di edad, E.R.F. naci na Venezuela di 63 aña di edad, J.A.C naci na Republica Dominicana di 52 aña di edad y e homber R.M.Z. naci na Aruba di 40 aña di edad.
R.M. Zievinger ta un conoci di husticia den otro caso di droga y den e caso aki su rol tabata minimo y ta afo caba. E siman aki el a logra su libertad bek.
Tambe a detene e muhenan di inicial: G.L.C. naci na Venezuela di 31 aña cu ta casa of pareha di un di e hombernan deteni. Tambe e muhe V.A.R. naci na Aruba di 57 aña cu ta traha na un luga cu ta manda carga y tabata handle containernan cu ta sali cu mercancia pa Hulanda. Team Narcotica a detene na su trabou. Despues di algun dia di detencion ya caba a lag’e bay y ta trahando atrobe.
Biniendo bek riba e caso, e entrada hudicial a confisca diferente articulo, manera: placa, telefon, auto, droga y documento.
No ta descarta cu por tin mas detencion den e proximo dianan. Si ta bon, a detene seis hende pero dos sigur ta liber caba. Esnan cu nan nomber ta aparece riba documentonan y responsabel pa e mercancia cu nan kier a manda Hulanda ta deteni.
Ultimo tempo, tin un demanda grandi pa manda droga di Aruba pa Hulanda. Consecuentemente, duana Hulandes ta masha pendiente ora vuelonan yega for di Aruba. Ta considera nos “risico vluchten”, mustrando poco confiansa den e pasaheronan procedente di nos isla.
