Permiti partido Curpa felicita PVV di Geert Wilders cu su victoria. Pa partido Curpa e resultado di eleccion no ta un sorpresa pa motibo cu e pueblo Hulandes a cansa di un gobierno cu a lubida riba su pueblo y e politica di frontera habri.
Esunnan cu a haya asilo politico ta biba manera un rey y e adultonan mayor ta pasa hamber. E gabinete di VVD durante 14 aña na poder a cera como 51 hospital y castiga e pueblo Hulandes cu medida y e placa di e pagadornan di belasting ta bay afo.
E pagado di belasting Hulandes ta mira su placa ta hinca den e guera di Ucraina y den tratado di Paris riba e cambio climatico cu ta un gañamento pa laba placa. E pueblo Hulandes no mester lubida e cambio den pensioen di e trahadonan Hulandes. Nos por compronde pakico Wilders a expresa su deseo di sali for di Union Europeo. E gobierno hulandes ta goberna p’e World Economic Forum cu ta goberna Union Europeo tambe. E paisnan Europeo ta practicamente den bancarota.
Media comprometi tabatin hopi influencia y a duna politico cu ta contra di Sustainable Development Goals un imagen negativo. Awe e berdad ta saliendo na luz di dia. Si bo sigui e placa anto lo bo haya sa ken tur ta tras di movecion aki. Un plan satanico pa kita libertad y privacidad di pueblo y pueblo lo tin cu biba na rudia. Prensa cu ta contra tambe lo ta censura.
E formacion di gobierno Hulandes no ta bay ta facil pasobra e socialistanan no lo kier perde nan poder. E pueblonan rond mundo a lanta for di soño y no ta sostene e politiconan gañado socialista mas. E resultado di eleccion na Ecuador y Argentina ta papia un idioma cla.
No lubida e gobierno di El Salvador. E pueblo Spaño tambe a lanta for di soño y tin un welga general na caminda pa saca e gobierno socialista for di poder. E pueblo Spaño a bisa ta basta. Na Merica e pueblo a realisa cu e media cumpra na principio a pinta Trump pa tur sorto di cos pero awo cos a cambia pasobra nan ta mira den ki desastre e pueblo Mericano ta bibando.
Durante Trump su periodo di gobernacion no tabatin guera y economia tabata prospera. Blackrock ta doño di mayoria media di comunicacion Mericano y e laboratorionan farmaceutico cu ta sostene e Sustainable Development Goals. Unico meta ta baha poblacion mundial.
E cambio cu ta sosode rond mundo lo yega Aruba tambe y ta spera cu pronto nos lo mira e gobierno mas malo den historia di Aruba bay cas p’a asina duna pueblo derecho pa bay urna electoral cu e speransa pa un cambio na bienestar di nos pueblo. Enbes di duna nos grandinan e atencion cu nan mester ta bin cu proyecto di cacho.
E minister a bolbe gaña e trahadornan di SABA. Unda e prioridad ta keda. Nos unico pilar economico gobierno ta pone na peliger pasobra e planta di purificacion na Bubaliplas ta sclama pa ayudo pero ta bringa un hotel pa un pida beach. E colmo de los colmos cu nos beachnan tambe ta contamina pavia cu ta habri e sluis y laga awa sushi di Bubaliplas bay lama.
Aruba mester di un gobierno nobo y un gobierno cu curashi pa haci un limpiesa pasobra riba un fundeshi corumpi y fofo no por construi. Esunnan cu a destrui nos isla lo bay cosecha locual cu nan a sembra. E ley di Dios ningun hende lo por burla di dje. E vengansa di Dios t’ey mes. Dios a permiti bo di a drenta den gobierno pero palabra ta bisa cu Dios ta permiti pero e lo kita tambe. Partido Curpa t’e unico alternativa.
