Ultimo simannan corte a bin ta trata varios caso di inmoralidad den corte. Mayoria no tin di haber cu abuso sexual of violacion, pero actonan di inmoralidad. Hopi biaha ta dificil pa e ciudadano comun y coriente compronde di con e diferencia den castigonan. Pero corte ta analisa tur aspecto di e sucedido den cuadro di loke e acusacion, manera e ta splica den ley.
Manera por ehempel awe mainta tabatin dos sentencia contra e hombernan Dijon Inesia (24) y Duncan Hovel. Ambos a tene relacion sexual cu un mucha muhe menor di edad, cu nan consentimento.
Den e caso di Inesia e tabata instructor di baile di e menor, cu corte a conclui e tabata den un posicion di “poder” riba e menor cu di un manera of otro el a convence pa tene relacion cu ne. E tabatin dos acusacion contra dje: sex cu menor di edad y posesion material fotografico sexual di menor di edad. E acusado a admiti y a bisa cu e mucha muhe lo a bis’e cu e tin 17 aña.
E menor ta admiti e relacion pero ta sinti cu e instructor a manipul’e y ora cu el a realisa esaki, a dicidi di conta su mama y asina e caso a cuminsa lora. Hues den su sentencia a bisa cu e acusado, mester a averigua bon edad di un mucha muhe cu e kier a tene relacion cu ne.
Pero tambe a tene cuenta loke cu abogado a bisa, cu su caso a wordo exponi den media y a marc’e como un pedofiel siendo cu esey no ta situacion. Den su caso fiscal a pidi 30 luna di cual 8 luna ta condicional y tres aña di prueba. Corte a yega na otro conclusion. A hay’e culpabel y a impone un castigo di 24 luna di cual 15 luna ta condicional y dos aña di prueba. SI fiscal no apela, e lo mester sinta un luna mas y por bay cas.
Den e caso di Duncan Hovel e mucha muhe tambe ta menor di edad y e acusacion ta cu el a tene relacion sexual cu un amor. Den su caso fiscal a pidi 24 luna di cual 12 luna ta condicional y tres aña di prueba. E caso aki tabata di un relacion unda cu e homber aki, awendia 25 aña, a wordo basila door di un mucha muhe cu despues a resulta menor di edad.
Tabatin un relacion afectoso cu finalisa den relacion sexual, te ora cu e acusado a haya sa cu e ta menor di edad. Esey tabata momento cu e tata a atrapa nan den camber. E momento ey e relacion a finalisa y nan a dicidi cu lo topa bek ora cu e mucha muhe cumpli 18 aña. E mama si tabata na altura di e relacion y a duna su aprobacion.
Pero mama a entrega keho y e caso a cuminsa lora pa finalisa den corte ya cu relacion cu menor, cu consentimento mes, ta keda un delito castigabel. A pidi un castigo di 24 luna di cual 12 luna ta condicional. Pero corte cu a hay’e culpabel, a impone un castigo di 18 luna di cual 325 dia ta condicional y tres aña di prueba. E castigo aki ta nifica cu awe lo sali liber.
