Biblioteca Nacional Aruba ta invita comunidad di Aruba pa un bunita evento diaranson venidero, 6 di maart 2024, cuminsando for di 6.30 p.m. pa 9.00 p.m. Biblioteca Nacional Aruba, Departamento di Cultura Aruba hunto cu gestor cultural Mirto Lacé lo presenta un programa multifacetico cu enfoke riba literatura, poesia, declamacion, canto, baile, musica, cultura y educacion.
Lo tin invitadonan special cu lo comparti nan pasion pa arte den e disciplina di arte cu cada un di nan ta eherce cu e obranan artistico musical y musica di Carlos Santana, arte di fotografia, arte di filmacion, tomo di poesia, y presentacion di dos obra literario. Autor y poeta Ariana Koolman Chirino lo deleita publico cu algun poesia dedica na celebracion di Dia Internacional di Hende Muhe.
Maybelline Arends-Croes y su grupo di cantante lo deleita tambe cu algun cancion. Musico, autor y ‘motivational speaker’, Ashok Hirdaramani, naci na Sri Lanka, 43 aña biba na Aruba, lo presenta su buki ‘Passion – Amazing – Mindset.’ E prologo ta skirbi pa Wini Paulo, filosofo, poeta, autor di Corsou.
E buki ta skirbi na idioma ingles y ta encera temanan manera ‘Change and create the life you truly desire. Discover a new synthesis to unfold the real secret to manifest and attract abundance.’ Roberto Croes lo ta presente cu su ultimo tomo di poesia Sentimento IV cu ta un coleccion di poesia basa riba amor.
Pa mas lesa TREMPAN.COM.
