Pa mas o menos 9:30pm e compania di siguridad a informa Polis cu e alarma di e edificio di Ministerio Publico situa den Rumbastraat a activa. Polis a core yega mesora na e sitio y berdad a constata cu a kibra bentana di e oficina unda Procurador General, Abogado General y Fiscalnan ta sinta.
E forma con a topa cu e glas kibra no ta splica mucho si ta un ladron cu a bay busca algo di horta eyden of ta un persona rabia cu Ministerio Publico cu a opta pa comete un acto di vandalismo riba nan edificio.
No por bisa exactamente ainda si a horta algo den e edificio, ainda ta mustra un caso mas bien di vandalismo. Mainta ora empleadonan yega lo por mira exactamente si a perde algo for di e oficina unda a kibra e bentana.
No mucho tempo atras Ministerio Publico a muda for di nan oficina bieu, na ex Banco Central, pa e edificio nobo traha den Rumbastraat. Mientras cu den dia nan ta conta cu siguridad di Cuerpo Especial Arubano, ta obvio cu anochi e luga no tin siguridad humano pa evita e tipo do actonan di vandalismo asina of hasta ladronicia.
