Despues di discusion henter dia, den oranan di atardi a aproba ehecucion e ley di codigo civil den cual tin e amienda di union civil cu a causa asina hopi controversia.
Durante henter dia por a scucha y saca conclusion con e resultado aki tabata. Marlon Sneek ya caba na 2016 a vota contra e amienda. E biaha aki tabatin tres parlamentario mas cu a vota contra esaki dialuna, prome di maart. Ta trata aki di Hendrik Tevreden, Darlaine Guedez-Erasmus y Robert Candelaria.
Pa e comunidad LGBTQ esaki tabata un triunfo, aunke nan deseo ta pa matrimonio. Pero e ta e prome caminda pa cuminsa.
Fundacion Orguyo mesora a pone un reaccion riba Facebook cu ta bisa lo siguiente: Fundacion Orguyo Aruba ta aprecia cu awe den parlamento e reconocimento, cu nos ta sperando desde 2016, a keda aproba cu un mayoria y asina e union civil a bira realidad den nos pais. Pero e igualdad ainda no ta existi, esaki pa Fundacion Orguyo Aruba ta keda como meta, igualdad real pa tur ciudadano.”
Un di e prome parlamentarionan cu a sali pafo despues di e votamento tabata parlamentario independiente Daphne Lejuez y a bisa “awe mi ta sali hopi satisfecho for di sala di parlamento. E ta hopi importante cu 17 parlamentario a vota pa pasa e codigo civil cu tin hopi derecho fundamental pa tur ciudadanonan di Aruba y no solamente e union civil,” el a expresa.
El a enfatisa cu ta papia di un union civil y no casamento. E union civil ta conta pa homber y muhe tambe, y banda di esaki tin otro 800 cambio den e codigo civil.
Michael Lampe no tabata den parlamento na 2016 ora cu e amienda a pasa. Loke tabata remarcabel p’e ta cu mayoria ta compronde e importancia di crea e herment pa sigura derecho di partnernan. “Di e forma aki ningun hende ta keda atras den nan derechonan. E tabata un dia importante pa Aruba. E ta forma parti di derecho humano y Aruba tin Tratado firma pa esaki cu emster cumpli cu ne.”
“Mi ta kere cu derechonan humano a haya bon representacion den parlamento. Pabien Aruba pasobra den parlamento a salvaguardia derechonan humano. Pabien cu e ley nobo,” Croes a bisa, kedando hopi breve den su comentario.
Tur 21 parlamentario tabata presente den e reunion aki y no tabatin abstencion.
