Momento di tension grandi ora cu a lock un criatura den auto. A bati alarma mesora pa rescta un baby di aproximadamente 2 aña, cu pa motibo di biento cu a pusha e porta di auto, tabata cera den auto.
Polis a presenta den parking lot patras di ex-Bon Bini Bazaar, pa asisti na un rescate di un criatura. E mama tabata preparando e stroller ora cu biento a dal e porta cera cu yabi paden. Porta lo a lock y e criatura a keda ge-lock den e vehiculo. Esaki a sosode den careda di 4:45 pm den Middenweg na Playa, na momento cu un mama lo a bati alarma.
Polis na sitio a haya aprobacion di e mama pa kibra e bentana parti patras pa asina por a habri e porta y yega na e criatura cu tabata den e asiento di patras na banda di pasahero.
E mama visibelmente preocupa yorando tabata wardando e polis habri e porta pa e por a yega mas lihe posibel na su baby. E criatura tambe hopi spanta yorando a calma manera cu e mama a brase.
Un rato despues cu e tension a pasa, e mama a bandona sitio.
