Recientemente Departamento di Inmigracion Aruba a haci entrega di 72 Landsbesluit na e coleganan di casi henter e organisacion y tambe a tuma oficialmente den dienst e coleganan nobo cu a cuminsa nan estudio basico aña pasa pa bira Immigratie Ambtenaar.
Esaki ta un proceso cu a dura basta aña, mas o menos 12 aña y di cual a pasa door di varios gobierno y ministerio pa por a finalmente yega na e logro aki.Director di Inmigracion Aruba, Andrew Hoo, kende tambe a caba di ricibi su Landsbesluit y ta nombra definitivamente den e funcion di Director di Inmigracion, a splica cu na aña 2006, IASA tabata e departamento cu a lanta pa ta encarga cu control di frontera. Esey tabata incorpora diferente departamento entre otro di KPA y Guarda Nos Costa.
Durante e añanan a mira e necesidad grandi pa cambio. “Cu hopi trabao y proceduranan cu sindicatonan y otro hefenan di departamento cu tabata akinan antes, a yega e momento cu finalmente e organisacion a bira Inmigracion Aruba”, Hoo a expresa. Segun e director ainda hopi hende ta confundi mirando cu nan ta yama e departamento IASA, a pesar cu tin dos aña caba ta fungi manera Inmigracion Aruba.
DESAROYO DI CARERA: E FLUHO MESTER SIGUI
Durante e reorganisacion, a bini tambe algun movemento di personal y hopi di nan posicion a cambia, cual na su turno ta haci cu nan mester a haya Landsbesluit nobo. Andrew Hoo a menciona cu tin yen di desaroyo y metodo di haci trabao cu a bin acerca despues di a haci e cambionan aki for di IASA pa Departamento di Inmigracion Aruba. “Dus nos a expande hopi. Ultimamente despues di basta aña nos ta haya un klas nobo, dus esey a haci un diferencia.” Esey tabata un empuhe grandi pa e personal actual por a sigui desaroya den nan carera”, Hoo a finalisa bisando.
