Rosa Nurys Godet ta CEO di N.V Exploitatie Maatschappij Reveillon Aruba y diaranson net prome cu merdia a dicidi di bin dilanti cu un preocupacion cu e tin. Godet a cuminsa na bisa cu el a dicidi pa duna e conferencia di prensa pa di un manera contribui na Aruba.
Directie Infrastructuur en Planning (D.I.P.) ta manera un piedra den nan caminda, e departamento di gobierno di cierto forma a blokia nan desaroyo. E compania ta conta cu un ekipo di inversionista, cu a yega Aruba na 2014, cu intencion di inverti pa e desaroyo y siguridad di Aruba.
Nan ta haci nan maximo esfuerso pa bin cu proyecto nobo. E compania ta uno solido y cu bon reputacion aki na nos isla y rond mundo. E inversionistanan a haci tur lo posibel pa haci lo miho y sigui cu e legado di Ash. Rosa Nurys Godet a comenta cu el a yega e “end” di purba haya un contesta for di D.I.P., sinembargo ta un caminda imposibel. El a conoce varios inversionista cu a opta pa bandona Aruba p’e mesun motibo aki. Hopi proyecto ta tranca pa falta di un firma.
Tin un proyecto, en especifico, cu nan ta purbando di desaroya desde 2014. E proyecto aki ta uno na Sabana Blanco. Pa motibo di hopi cambio y ekipo nobo na D.I.P. e cosnan ta keda tranca. Godet a cera conoci cu e director di D.I.P.. Su yiunan mes tin interes pa inverti na Aruba.
“Mi no ta aki pa partido politico, nos ta inversionista en busca di lo miho pa Aruba”, Godet a enfatisa. Su ekipo tin inversionista hoben cu interes pa realisa proyecto na Aruba. Pa e inversionista a comenta cu no por sigui basa nos mes riba un posicion politico. El a comenta cu “si bo haya un posicion y bo no por maneh’e…djis bay”. El a topa cu minister-president den varios ocasion pero ningun tabata adecua pa trata e topico aki.
Tanto D.O.W. como D.I.P. mester yega na otro pasobra no por progresa sin traha como un ekipo. Cada departamento ta trahando separa sin cu mester y esaki ta stroba e proceso pa e inversionista. Pa falta di un firma tin cantidad di miyonario canando rond yen cu papel sin por inverti. Ta imposibel cu Aruba ta sigui cu proyectonan cu ta keda na mita. Otro cos cu Godet a comenta ta cu a bira momento pa nos bay digital, no tin motibo pa hende keda cana cu stapel di papel. Godet ta di pensamento cu mientras un departamento ta move, e otro no y esaki ta algo cu ta wanta e trabou.
