Den cuadro dje di dos fase di e proyecto Proceso di Revitalisacion di e area cerca di Columbusstraat y Wilhelminastraat na Oranjestad, na prome instante a informa cu lo cera e area aki diaranson. Pero pa motibo cu e compania no a keda cla pa cuminsa diaranson, a hala e fecha cu un dia.
Pero diahuebs si a cera e caminda di Wilhelminastraat na altura di Plaza Brenchie’s y e trabounan ki lo tin un duracion di trinta dia. Esaki ta e fase dos di e proyecto proceso di revitalisacion di centro di ciudad.
Inicialmente, e plan tabata pa desvia trafico pa bira bay zuid den direccion di Irenastraat pa despues bira drenta Caya E.J. Harms, pa bira drenta Zoutmanstraat, Zuidstraat y drenta bek den Wilhelminastraat. E unico manera cu e trafico por subi e caminda ta pa drenta Ooststraat ta si e chauffeur mester bay un di e tiendanan den e caya aki.
DOW ta pidi cooperacion di e automobilistanan pa por fabor, pa tene e parkeerplaat dilanti di Paris Restaurant, habri y asina e busnan tin espacio pa tuma nan birada, pero tambe cualkier truck di compania pa haci esaki mas facil.
E plan aki tin como meta pa transforma e area en cuestion den e districto culinario “par excellence” di e ciudad, mehorando asina e estetica, accesibilidad y su funcionalidad tanto pa localnan como pa bishitantenan.
E caya lo ta cera un 30 dia, es decir, un luna largo, sacando e dianan di fiesta y fin di siman afo. Si tur cos cana manera mester ta, caya lo habri bek dia 13 di mei proximo.
