Aruparking keto bay ta un dolor di cabes pa gobierno di Aruba. Un auto mal para of cu no a paga, por haya un sticker, pero no por duna e doño di auto boet.
Pero, e problematica di adictonan ambulante den centro di ciudad ta un berdadero dolor di cabes pa un y tur. Kiebro tur caminda y e mashinnan di Aruparking no ta un excepcion. Cuanto biaha no ta wak e adictonan ta sacudi e mashinnan pa saca e placa.
Sinembargo, ultimo aki nan a purba di bay cu un di e mashinnan cu tabata poni patras di La Moderna, den Caya Grandi.
Pero den e ultimo dianan, a bin descubri un mashin di Aruparking tur destrui riba e plenchi di un scol na San Nicolas, pa ta exacto Don Bosco School. Tin tur indicacion cu e mashin di Aruparking cu a “disparce” y e mashin haya den cura di Don Bosco School, no ta relaciona cu otro.
Ainda nos ministernan di Aruba ta den un dilema, cu ta e mesun Prome Minister di Aruba, mr. Evelyn Wever-Croes a indica cu Minister encarga cu Aruparking, Ursell Arends di un banda ta dispuesto pa duna su cooperacion pa trece bida bek den caya grandi. Pero di otro banda, e kier evita di comete ‘kapitaalsvernietiging’ door di kita tur e mashinnan di Aruparking.
Dianan ta pasa bay, luna- y te hasta añanan ta pasa bay, sin cu tin un maneho adecua y concreto pa cu Aruparking. Gobierno ta bisa di kier tin un maneho structura, sinembargo, despues di casi cuater aña cu a bisa di lo elimina Aruparking, te ainda e t’ey, sin cu e ta ‘bevoegd’ pa sea duna boet, klem e taira di auto of te hasta touw.
Pero, mientras cu Gobierno ta yega na un solucion concreto y definitivo, parkeer den centro di ciudad, ta keda un dolor di cabes.
Por corda ainda cu tabata ex-Minister Otmar Oduber cu a bin cu e proyecto aki, un proyecto miyonario cu a costa pais Aruba hopi placa, pero cu no ta regla di un manera adecua.
