Manera anticipa, diaranson atardi Minister Rocco Tjon a tuma e decision pa suspende Emilio Geerman, miho conoci como “Emi” for di su funcion di ta “belast let de leiding” di Korps Brandweer Aruba (KBA). A prohibi su entrada den tur facilidad di Cuerpo di Bombero, cu ta nifica edificio y vehiculonan, pa un maximo di seis siman, pa un investigacion interno. Cu esaki e retonan na Brandweer ta bira mas grandi ainda pasobra e cuerpo ta keda sin liderazgo, pa cual mester a nombra un otro persona pa temporalmente mantene e departamento operacional.
Tabata dialuna anochi cu un automobilista a señala cu e auto marca Hyundai modelo Accent color blanco, numera V-2913, tabata core malo riba caminda. E chauffeur tabata maneha estilo “zig zag” y tabata obliga auto di direccion contrario pa baha fo’i caminda pa evita un desgracia. Un auto a siguie, mientras polis tabata biniendo p’e. Dado momento el a yega su cas na Moko y net polis tambe a yega. A constata boter di biña den e auto benta ainda. E homber no a aprecia presencia di polis y a start un racha di insulto contra nan y a hasta reta nan. Pero e polis hobennan eynan no tabatin un idea mes di ken e “meneer” aki ta.
Ta te ora nan a yega ward’i polis na Shaba a bin tende cu ta Emilio Geerman, ex-polis y actual hefe di Cuerpo di Bombero. Pero ni na ward’i polis e no a rasona y a yama e defensornan di ley como “Polis di Cracker Jack” y cu e lo bin pa tur bek un pa un. El a calma ora cu un ex-colega di dje, un polis pensiona a yega warda pa busc’e y percura pa e yega su cas.
Diamars nada no a pasa y e no a bay trabou, probablemente wayaba henter dia. Diaranson nan a yam’e na Cocolishi y a señal’e saliendo di eynan cu un papel den man. Diahuebs a sali na cla cu a dicidi di suspend’e pa por investig’e. Den e proceso e lo mester entrega e V-wagen bek y no mag tin ningun pertenencia di trabou den su poder. Si e lo scapa e biaha aki no ta sigur, pero no ta prome biaha cu e ta haci tipo di hazañanan asina.
Den pasado caba nan a yega di deten’e caba pa stuur auto burachi. E tempo ey tambe el a lastra e polisnan na su antoho. Pero e biaha ey si e Sub Fiscal a ordena su encarcelacion, specialmente pasobra el a menasa y coba mama di e Sub Fiscal y tur otro polis na warda. Pero t’e mesun ex-colega, e tempo ey tambe a bin warda pa papia p’e te cu a lag’e pidi despensa y el a hib’e su cas. E pregunta ta si un hende asina cu problema di adiccion na alcohol por ta apto pa un funcion crucial asina.
Emilio Geerman a bira polis den e klas di aña 1982, pues 42 aña pasa. E tabata director di KIA pero a mand’e cas den “overtolligheidspoel” pa hopi aña largo. Recien a opta pa bolbe trec’e bek pero e biaha aki na Cuerpo di Bombero. E ta famia di Parlamentario Shailiny Tromp-Lee, pues tin vinculo politico directo cu e gobierno na mando. Ki posicion Lee lo tuma awo, no ta conoci ainda.
Emi Geerman ta confronta varios acusacion contra dje, entre otro di stuur auto di dienst burachi, di tabata burachi den un area publico y di a insulta y menasa polisnan den funcion. Den pasado el a scapa door di manda carta pidi despensa. E biaha aki el a bisa su amigonam cu e tin hopi stress di trabou y a admiti cu el a faya barbaramente aki y cu e ta sinti duele di kico el a haci. El a keda di pidi despensa atrobe, awo cu e ta bek “na tino”.
Ironia ta cu a suspende un bombero den pasado caba pasobra el a subi warda betra y a dal un truck di bombero. Pues e bomberonan awo ta entusiasma pa mira cu ki handschoen e minister lo maneha e caso aki awo. Esaki meintras cu den Cuerpo Policial Aruba ainda inspector Kenneth Philips ta suspendi na cas, pasobra el a stuur un auto di dienst burachi.
Tocante Cuerpo di Bombero
Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu como 140 empleado, di cual e mayoria ta traha activamente den combatimento di candela y trabounan di rescate. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas o menos 1600 melding, cu ta varia entre combatimento di candela, rescate, yudansa special y trabounan na aeropuerto. Awendia e cuerpo ta bou encargo di un Management Team, cu ex-polis Emiliano Geerman na cabes.
