Memey di un atake na nos turismo door di tanto ladronicia y atraco cometi riba nos unico pilar economico, un storia bunita ta resalta. Corine Sicignano, un turista cu recientemente a bishita nos isla, a publica su experiencia riba e pagina All Things Aruba.
Sicignano a bisa cu diahuebs nan mester a bula for di Aruba. Na momento cu nan a yega aeropuerto nan a topa cu e aeropuerto completamente yen y druk debi cu e tabata cera e mainta ey. Ora cu finalmente nan a yega pa check-in, nan a haya sa cu Delta a bruha e ticket di Angelo (e yiu) y p’e motibo ey nan no por a bula.
Ademas di esey, e aerolinea a avisa e famia cu nan no lo por haci cambio y nan lo mester tuma contacto cu Expedia, cu a tuma nan por lo menos dos ora p’asina por haya vuelo pa e siguiente dia. Finalmente nan a logra haya un auto pa huur y a bay bek nan hotel.
E turista a expresa cu tabata laat pues nan a opta pa bay come un rato na Dushi Burger and Bagels. Pero ta net n’e momento cu e cuminda a yega mesa cu Angelo a cuminsa yora. E mama ta conta cu e restaurant tabata yen di hende.
E waiternan a yega cerca nan y puntra a famia si nan (e waiternan) por a carga e baby pa e mayornan por a come trankil. E mama a expresa cu prome el a hay’e poco straño pero Angelo a calma mesora y a pega soño. E mama a agrega cu esaki ta un di e cosnan di mas bunita cu un persona desconoci a yega di haci p’e.
Kisas e no ta mustra di ta gran cos pero e pareha tabata cansa y yena cu stress despues di un dia largo. “Ainda tin hende bon na mundo, specialmente na Aruba”, tabata expresion di e mama.
