Liliana Rasmijn, Vocero di Polis tabata pareu hunto cu nos team di redaccion riba caya durante cobertura di Jouvert Morning diasabra mainta. Tur cos a cuminsa bon, Jouvert Morning a sali net na ora tambe cual tabata 3’or di mainta y practicamente tur banda tabata riba ruta caba.
Polis a bini cu 140 personal completo pa Jouvert Morning sperando pueblo por a comporta. Ora cu e parada a cuminsa tur cos tabata canando basta bon segun Rasmijn, riba un speed basta trankil caminda hendenan por a gosa pero tabata tin aglomeracion grandi di hende caba for di trempan.
Faya Bo Haya a drenta na vigor di biaha tambe. Aña pasa tabata tin 19 detencion pa loke tabata Jouvert Morning, sperando cu e aña aki lo tin hopi menos. “Ban wak, nos djis kier pueblo gosa y comporta, pasobra corda cu anochi nos t’ey atrobe,” Rasmijn a expresa.
Representante di SMAC Jason Brown a informa nos cu tabata tin tres banda y dos truck cu DJ riba e ruta di Jouvert Morning.
Tabata trata di Groove Masters, Tsunami y Bulera cu Royal Sound System y tur cos a sali super bon na ora.
