Diasabra mainta un chauffeur bebi cu a caba di manece na Jouvert Morning na San Nicolas, a causa un accidente pisa, cu herido, riba De La Sallestraat na Playa.
E auto modelo Cube color blauw tabata bay zuid y un auto marca Toyota modelo Camry tabata bay direccion di rotonde na Sero Blanco. Banda di e cura di Colegio EPI, den e birada grandi, e chauffeur di e Cube a bay den robes y dal frontal den e Camry.
Polis a yega mesora y a constata cu e chauffeur di e Cube no tabata para bon riba su pia. E tabata herida cu sla na cabes. Polis a pone supla di biaha y a pasa 632 ugl di cantidad di alcohol den su rosea.
E limite permiti pa ley ta 220 ugl, pues e ta casi tres biaha e locual ta aceptabel pa por stuur un vehiculo di motor. Cu e nivel cu a constata, ta nifica cu automaticamente e ta perde su rijbewijs, te ora e presenta dilanti hues pa sea verifica e decision of si ta dun’e un otro chens.
Como cu su cabes tabata sangra hopi, a lag’e bay cu ambulance pa e por ricibi cuido medico na hospital. Ambos auto ta sigura y takelwagen tabata necesario pa move nan for di riba caminda y pone nan un banda.
